“Bloomberg”in yanvarın 19-da (bu gün) yaydığı xəbərə görə, Çin Milli Statistika Bürosu tərəfindən açıqlanan rəsmi rəqəmlərə əsasən, ötən il ölkədəki doğumlar 5,6-ya enib və ümumi yeni doğulanların sayı 7,9 milyon təşkil etdib. Bu isə 1,6 milyonluq kəskin geriləmə kimi qiymətləndirilir və 2020-ci ildən bəri ən sərt illik eniş hesab olunur.
Doğum göstəricilərindəki bu geriləmə Çinin ümumi əhalisinin 3,4 milyon nəfər azalmasına səbəb olub və nəticədə ölkə ardıcıl dördüncü ildir ki, illik əhali azalması ilə üzləşib.
Açıqlanan rəqəmlər dövlət başçısı Si Cinpinin doğumun təşviq edildiyi cəmiyyət formalaşdırmaq səylərinə ciddi zərbə kimi qiymətləndirilir. Buna baxmayaraq, Çin hakimiyyəti nağd maliyyə dəstəyi, uzadılmış valideyn məzuniyyəti və digər stimullaşdırıcı tədbirləri həyata keçirməyə davam edir.
Məlumatlara görə, Çin 2024-cü ildə 1980-ci ildən bu yana ən aşağı nikah sayını da qeydə alıb. İl ərzində cəmi 6,1 milyon cütlük evlənib ki, bu da 2023-cü illə müqayisədə 20,5 faiz azalma deməkdir. Eyni zamanda, boşanma göstəriciləri 1,1 faiz artıb.
Doğum səviyyəsindəki eniş doğum yaşında olan qadınların sayının azalması ilə daha da dərinləşib. Bununla yanaşı, gənc nəsillərin sosial və iqtisadi təzyiqlər səbəbindən evlilik və valideynlik qərarlarını gecikdirməsi də əsas amillərdən biri kimi göstərilir.
Pekin hakimiyyəti evlilik və doğum göstəricilərinin azalmasına qarşı müxtəlif siyasətlər tətbiq etsə də, bu tədbirlərin hələlik nəzərəçarpacaq təsiri müşahidə olunmayıb.
Rəsmi məlumatlara əsasən, Çinin əhalisi 2024-cü ildə təxminən 1,4 milyard nəfər olub ki, bu da 2021-ci ildən bəri üçüncü ardıcıl illik azalma deməkdir.
Çin iqtisadiyyatı
Digər tərəfdən, rəsmi statistika Çinin iqtisadiyyatının 2025-ci ildə 5 faiz artaraq hökumətin illik iqtisadi böyümə hədəfinə çatdığını göstərir.
Çin Milli Statistika Bürosunun açıqladığı rəqəmlərə görə, ölkənin ümumi daxili məhsulu 140 trilyon yuan (təxminən 20 trilyon ABŞ dolları) səviyyəsinə yüksələrək rekord göstərici qeydə alıb.
Dünyanın ikinci ən böyük iqtisadiyyatı zəif daxili tələbat, deflyasiya meyilləri, daşınmaz əmlak sektorunda uzunmüddətli durğunluq və ABŞ-nin tarif siyasətləri ilə bağlı xarici qeyri-müəyyənliklərə baxmayaraq, hökumətin təxminən 5 faizlik hədəfinə uyğun iqtisadi artım təmin edib.
