Türkiyə Respublikasının Müdafiə Nazirliyi noyabrın 27-də bildirib ki, Rusiya ilə Ukrayna arasında atəşkəs əldə olunmadan, Türkiyənin beynəlxalq bir təhlükəsizlik qüvvəsinə töhfə verməsi ilə bağlı hər hansı müzakirə aparılması mümkün deyil.

Nazirlik Türkiyə əsgərlərinin çoxmillətli bir sülhməramlı missiyanın tərkibində Ukraynaya göndərilə biləcəyi iddiaları ilə bağlı açıqlama verib. Açıqlamada deyilir: “Harada sülhə, təhlükəsizliyə və sabitliyə ehtiyac yaranırsa, ağıla ilk olaraq Türkiyə Silahlı Qüvvələrinin gəlməsi, TSQ-nin malik olduğu imkan və qabiliyyətlərin, eləcə də təsir gücü, çəkindiriciliyi və nüfuzunun ən mühüm göstəricisidir. Əvvəlcə Rusiya ilə Ukrayna arasında atəşkəsin təmin edilməsi zəruridir. Daha sonra isə səlahiyyətləri dəqiq müəyyən olunmuş missiyanın çərçivəsinin müəyyənləşdirilməsi, hansı ölkənin hansı həcmdə töhfə verəcəyinin ortaya qoyulması tələb olunur. Türkiyə Silahlı Qüvvələri bölgəmizdə təhlükəsizlik və sabitlik yaradacaq istənilən təşəbbüsə dəstək verməyə hazırdır.”

Açıqlama Fransanın prezidenti Emmanuel Makronun noyabrın 25-də gələcəkdə mümkün ola biləcək təhlükəsizlik qüvvəsinə Fransa, Böyük Britaniya və Türkiyə hərbçilərinin daxil edilə biləcəyini fikrini irəli sürməsindən sonra verilib.

Müharibə başlayandan bəri rəsmi Moskva və Kiyev rəhbərliyi ilə balanslı münasibətlər saxlayan Ankara hökuməti bildirib ki, mümkün yerləşdirmə məsələsini müzakirə etməyə açıqdır, lakin bu missiyanın məqsədləri və müdaxilə çərçivəsi tam şəkildə müəyyən olunarsa, bu prosesə dəstək verilə bilər.

Avropanın iştirakı

Avropadakı hökumətlər ABŞ prezidenti Donald Trampın irəli sürdüyü 28 maddəlik Ukrayna sülh planı ilə bağlı müxtəlif narahatlıqlarını dilə gətiriblər. Planda Ukraynadan geniş ərazi və hərbi güzəştlər tələb olunduğu, bunun isə rəsmi Kiyevi təslimiyyətə sürükləmək riski daşıdığı irəli sürülüb.

Avropalı müttəfiqlərin təzyiqi və ABŞ–Ukrayna rəsmilərinin Cenevrədə keçirdikləri görüşlərdən sonra planın yenidən nəzərdən keçirildiyi bildirilib.

Proses irəlilədikcə Avropadakı aktorlar danışıqlara daha birbaşa şəkildə cəlb olunublar.

Birləşmiş Krallıq, Fransa və Almaniya hazırladıqları qarşı təklifdə hər hansı razılaşmanın Ukraynanın suverenliyini qoruması, ərazi güzəştlərindən yayınması, müdafiə qabiliyyətinin məhdudlaşması və gələcək təhlükəsizlik mexanizmlərinin formalaşdırılmasında Avropanın rolunun təmin edilməsinin vacibliyini vurğulayıblar.

Rəsmi Ankara isə Qərbdən bu cür təkliflərin edildiyi bir dövrdə öz mövqeyinin dəyişmədiyini bir daha bəyan edərək bildirib ki, hərbi qüvvələrin yerləşdirilməsi ilə bağlı danışıqlar atəşkəs təmin edilmədən, səlahiyyətlər açıq şəkildə müəyyənləşdirilmədən və iştirakçı dövlətlər arasında dəqiq və şəffaf vəzifə bölgüsü aparılmadan irəliləyə bilməz.

Türkiyə Respublikasının Müdafiə Nazirliyi əlavə edib ki, regional sülh və sabitliyi gücləndirməyi hədəfləyən istənilən təşəbbüs ancaq bu ilkin şərtlər tam şəkildə qarşılandıqdan sonra qiymətləndiriləcək.