Ukrayna Quru Qoşunları təhlükəsizlik tədbirlərinə baxmayaraq, Rusiyanın təlim obyektini hədəfə aldığını açıqlayıb. Hücumun yeri təsdiqlənməsə də, Çerniqov yaxınlığında baş verdiyi güman edilir.

Ukrayna Quru Qoşunlarından verilən açıqlamaya görə, Rusiyanın Ukraynadakı təlim bölməsinə raket hücumu nəticəsində 3 əsgər həlak olub, 18 nəfər yaralanıb.

Quru Qoşunlarının "Telegram"da yaydığı bəyanatda bildirilib: "Bu gün, iyulun 29-da düşmən Ukrayna Silahlı Qüvvələrinin Quru Qoşunlarının təlim bölmələrindən birinin yerləşdiyi yerə raket zərbəsi endirib.

Görülən təhlükəsizlik tədbirlərinə baxmayaraq, təəssüf ki, şəxsi heyət arasında itkilərin qarşısını tam almaq mümkün olmayıb. Saat 21:30-a olan məlumata görə, 3 əsgər həlak olub və 18-i isə yaralanıb".

Bəyanatda hücumun harada baş verdiyi açıqlanmayıb.

Bununla belə, bəzi hərbi blogerlər hücumun Ukraynanın şimal sərhədi yaxınlığında, Çerniqov vilayətində baş verdiyini irəli sürüblər.

Qeyd edək ki, iyun ayında Rusiyanın Ukraynanın mərkəzindəki başqa bir poliqona hücumu nəticəsində 12 əsgər həlak olub, onlarla əsgər yaralanıb.

Bu hücum Ukrayna Quru Qoşunları komandanının istefasına səbəb olub. O, sonradan başqa vəzifəyə təyin edilib.