Türkiyənin xarici işlər naziri Hakan Fidan oktyabrın 2-də Birləşmiş Ərəb Əmirliklərinə səfər edəcək. Bu barədə Türkiyə Xarici İşlər Nazirliyinin yaydığı bəyanatda məlumat verilib.
Hakan Fidanın səfər zamanı Türkiyə ilə BƏƏ arasında çoxşaxəli əməkdaşlığın daha da inkişaf etdirilməsi niyyətini vurğulayacağı gözlənilir. O, regional hadisələrlə bağlı məsləhətləşmələr aparacaq və xüsusilə ABŞ prezidenti Donald Trampın sentyabrın 29-da açıqladığı plandan sonra Qəzzada atəşkəs və sülhün əldə edilməsi səylərinə diqqət yetirəcək.
Hakan Fidan müharibə nəticəsində böyük dağıntılara məruz qalmış Suriyada sabitliyin və yenidən qurulmanın təmin olunması üçün Suriya hökumətinə dəstəyin vacibliyini vurğulayacaq.
Qeyd edək ki, Hakan Fidan sonuncu dəfə BƏƏ-yə mayın 5-də səfər edib və ölkə Prezidenti Şeyx Məhəmməd bin Zayed Əl Nəhyan tərəfindən qəbul olunub. Səfər çərçivəsində o, xarici işlər naziri Şeyx Abdullah bin Zayed Əl Nəhyan ilə də görüşlər keçirib.
Türkiyə ilə BƏƏ arasındakı ikitərəfli münasibətlərdə son illərdə əhəmiyyətli irəliləyişlər əldə edilib. Prezident Rəcəb Tayyib Ərdoğanın 2023-cü ilin iyulunda BƏƏ-yə səfəri zamanı iki ölkə arasında münasibətləri strateji tərəfdaşlıq səviyyəsinə yüksəldən Yüksək Səviyyəli Strateji Şuranın (YDSK) yaradılması barədə razılıq əldə olunub.
