Sudan Həkimlər Birliyi yanvarın 23-də açıqlama yayaraq, Sudanın Cənubi Kordofan bölgəsində yerləşən bir qızıl mədəninin uçması nəticəsində altı nəfərin həyatını itirdiyini, 12 nəfərin yaralandığını və onlarla şəxsin hələ də itkin düşdüyünü bildirib. Açıqlamada xilasetmə işlərinin sürətləndirilməsi və yaralılara təcili tibbi yardım göstərilməsi çağırışı edilib.
Qeyri-hökumət təşkilatı həmçinin oxşar fəlakətlərin təkrarlanmaması üçün hökumətin mədənçilərin təhlükəsizliyini təmin edəcək tədbirlər görməsinin vacibliyini vurğulayıb. Təhlükəsizlik standartlarının müəyyənləşdirilməsi, təlimlərin keçirilməsi və mütəmadi yoxlamaların aparılması çağırışı edən təşkilat institusional səhlənkarlığın və qanunların icra olunmamasının mədənçilərin həyatını təhlükə altına atdığını bildirib.
Bəyanatda məsul şəxslərin cavabdehlik daşımalı olduğu və oxşar faciələrin qarşısının alınması üçün konkret addımların atılmasının zəruri olduğu da qeyd olunub.
Kiçikmiqyaslı qızıl mədənçiliyi Sudan üzrə əksər hallarda son dərəcə ağır şəraitdə iki milyondan çox insanı işlə təmin edir və ölkənin ümumi qızıl istehsalının təxminən 80 faizini təşkil edir.
Sudan hökuməti əl əməyinə əsaslanan mədənçiliyi qadağan etmir, lakin onu tənzimləməyə çalışır. Çətinliklərinə baxmayaraq, bu sektor çox sayda Sudan vətəndaşını işlə təmin edir və məşğulluğun artırılmasına töhfə verir.
Qeyd edək ki, Sudan 2011-ci ildə Cənubi Sudanın mütəqillik elan edərək ayrılmasından sonra neft gəlirlərinin dörddə üçünü və valyuta mənbələrinin təxminən 80 faizini itirdikdən sonra, qızıla mühüm valyuta mənbəyi kimi böyük dərəcədə asılı vəziyyətə düşüb.
