Yerli medianın verdiyi məlumata görə, İran ordusuna məxsus helikopter İsfahan vilayətinin Dorçeh bölgəsi yaxınlığında qəzaya uğrayıb. Hadisə nəticəsində dörd nəfər həyatını itirib.

İranın yarı-rəsmi "Mehr" xəbər agentliyinin bildirdiyinə görə, ilkin ehtimallara əsasən, helikopter meyvə-tərəvəz bazarı kompleksinin ərazisinə düşüb.

Agentlik qeyd edib ki, qəza zamanı helikopter təlim uçuşu həyata keçirirmiş. Hadisə nəticəsində pilot və köməkçi pilotla yanaşı, bazarda çalışan iki mülki şəxs də həlak olub. Qəzanın səbəbi barədə hələlik rəsmi açıqlama verilməyib.

Bu, İranda bir həftədən az müddətdə baş verən ikinci aviasiya qəzasıdır. Ötən cümə axşamı İranın qərbindəki Həmədan şəhəri yaxınlığında "F-4" qırıcı təyyarəsi düşmüş və pilotlardan biri həlak olmuşdu.

İranın ölümcül aviasiya qəzaları ilə bağlı statistikası kifayət qədər qabarıqdır. Qərbin sanksiyaları İrana təyyarə hissələrinin tədarükünə mane olur ki, bu da ölkənin həm dövlət, həm də kommersiya məqsədləri üçün köhnəlmiş helikopter və təyyarələrindən asılı qalmasına səbəb olur.