İsrail ordusu işğal altındakı İordan çayının Qərb sahilində keçirdiyi hücum nəticəsində bir fələstinli uşağı öldürüb, daha dörd nəfəri yaralayıb. Fələstin Səhiyyə Nazirliyi noyabrın 16-da açıqlama yayaraq bildirib ki, Tubas şəhərinin cənubunda yerləşən “əl-Faria” qaçqın düşərgəsində 15 yaşlı Cədallah Cihad Cumaa Cədallah İsrail hərbçiləri tərəfindən atəş açılaraq öldürülüb.

Rəsmi VAFA xəbər agentliyinin məlumatına görə, tibb işçiləri düşərgədə iki nəfərin qəlpə yaralarını müalicə edib. Agentlik əlavə edib ki, təcili yardım maşınlarının üçüncü yaralıya çatmasına maneə yaradılıb və həmin gəncin sonradan həyatını itirdiyi bildirilib.

Hadisə şahidləri “Anadolu” agentliyinə verdikləri müsahibədə qeyd ediblər ki, İsrail qüvvələri düşərgəyə basqın edərək intensiv şəkildə atəş açıblar və bu, bir neçə şəxsin yaralanmasına səbəb olub. VAFA-nın digər məlumatında isə bildirilir ki, işğal altındakı Qərb sahilinin şimalındakı Cenin şəhərində İsrail ordusuna məxsus hərbi maşın bir taksi ilə toqquşaraq qəza törədib və nəticədə iki fələstinli yaralanıb.

Fələstin rəsmilərinin açıqlamasına əsasən, 2023-cü ilin oktyabrında Qəzzaya qarşı başlanmış soyqırımdan sonra İordan çayının Qərb sahilində İsrail ordusunun və qeyri-qanuni israilli məskunlaşanların hücumları kəskin şəkildə artıb. Bildirili ki, indiyədək 1.073-dən çox fələstinli öldürülüb, təxminən 10.700 insan yaralanıb.

İsrailin 2023-cü ilin oktyabrından bəri intensiv şəkildə hava və quru hücumları həyata keçirdiyi Qəzzada isə, Fələstin tərəfinin hesabatına görə, əsasən qadınlar və uşaqlar olmaqla, təxminən 70.000 fələstinli həlak olub.

Xatırladaq ki, Beynəlxalq Ədalət Məhkəməsi ötən ilin iyul ayında açıqladığı rəsmi hüquqi rəydə İsrailin Fələstin torpaqlarını işğalını qanunsuz adlandırıb və işğal altındakı İordan çayının Qərb sahili ilə Şərqi Qüdsdə mövcud olan bütün israilli yaşayış məntəqələrinin tam şəkildə boşaldılmasını tələb edib.