ABŞ Prezidenti Donald Tramp Ağ Evdə jurnalistlərin suallarını cavablandırarkən İranla bağlı bəyanatlar verib. Nüvə silahından istifadə ehtimalını rədd edən Tramp buna ehtiyac olmadığını vurğulayıb.

"Nüvə silahından istifadə etmədən İranı tamamilə məhv etmək imkanım olduğu halda, buna niyə ehtiyac duymalıyam? Ümumiyyətlə, heç kimin bu silahlardan istifadəsinə icazə verilməməlidir",-deyə Donald Tramp qeyd edib.

Donald Tramp iki həftəlik atəşkəs dövründə İranın öz hərbi ehtiyatlarını qismən bərpa etməsi ehtimalına da toxunub. O, ABŞ-nin İranın hərbi gücünü artıq böyük ölçüdə sıradan çıxardığını qeyd edərək deyib: "Onların donanması, hava qüvvələri və hava hücumundan müdafiə sistemləri məhv edilib. Əgər fasilə müddətində nəsə toplasalar belə, biz bunu cəmi bir günə bitirəcəyik".

Tramp hazırda razılaşma imkanı olsa da, müvəqqəti sazişə deyil, uzunmüddətli və davamlı bir müqaviləyə üstünlük verdiyini bildirib.

Xatırladaq ki, aprelin 7-də İranı ‘‘bütöv bir sivilizasiya bu gecə məhv ediləcək’’ deyərək hədələyən Donald Tramp qısa müddət sonra atəşkəsə razılıq vermişdi. Hazırda ABŞ-nin Hörmüz boğazı üzərində tam nəzarətə sahib olduğunu deyən dövlət başçısı boğazın açılmasına hələlik icazə verməyəcəyini deyib.

"Boğazın açılması İranın gündə 500 milyon dollar qazanması deməkdir. Məsələ həll olunana qədər buna icazə verməyəcəyəm",-deyə Donald Tramp vurğulayıb.

Regiondakı gərginlik fonunda qlobal enerji qiymətlərinin artmasına da münasibət bildirən Tramp, amerikalıların bir müddət yüksək benzin qiymətləri ilə barışmalı olduqlarını qeyd edib. O, əsas məqsədinin həm ABŞ, həm də Yaxın Şərq üçün nüvə təhlükəsi yaratmayan bir həllə nail olmaq olduğunu bildirib.

Qeyd edək ki, rəsmi Tehran nüvə silahı hazırlamaq iddiasını rədd edir. BMT-nin müvafiq nəzarət orqanları da müharibədən əvvəl İranın atom bombası əldə etmək üçün qəti addımlar atmadığını bəyan etmişdi. Hazırda regionda gərginlik davam edir.