Türkiyə Prezidenti Rəcəb Tayyib Ərdoğan Balkan ölkələrinin xarici işlər nazirləri və yüksək vəzifəli diplomatik nümayəndələri ilə İstanbulda keçirilən görüşdə ikitərəfli münasibətləri və regional məsələləri müzakirə edib.

Yanvarın 23-də Prezident Administrasiyasının İctimaiyyətlə Əlaqələr İdarəsi tərəfindən yayılan açıqlamaya əsasən, toplantıda Monteneqro Xarici İşlər naziri Ervin İbrahimoviç, Kosovo Xarici İşlər naziri Donika Gervalla-Şvarts, Bosniya və Herseqovina Xarici İşlər naziri Elmedin Konakoviç, Şimali Makedoniya Xarici İşlər naziri Timço Muçunski, Albaniya Xarici İşlər naziri Elisa Spiropali və Serbiya Xarici İşlər nazirinin müavini Nevena Yovanoviç iştirak edib.

Prezident R.T.Ərdoğan Balkan Sülh Platformasının ikinci toplantısının İstanbulda keçirilməsindən məmnunluğunu ifadə edərək, iştirakçı ölkələrin nümayəndələrinə verdikləri töhfələrə görə təşəkkür edib.

Ölkə rəhbəri R.T.Ərdoğan sərhəd təhlükəsizliyi, enerji, texnologiya və nəqliyyat kimi mövzuların müzakirə olunduğu məsləhətləşmələrin əhəmiyyətinə diqqət çəkib.

Dünya miqyasında və Balkanlarda çoxsaylı çətinliklərlə üzləşildiyini qeyd edən R.T.Ərdoğan Balkan Sülh Platformasına üzv ölkələr arasında həmrəyliyin və qarşılıqlı anlayışın gücləndirilməsinin hər zamankindən daha böyük əhəmiyyət daşıdığını vurğulayıb.

Balkanlarda keçmişdə yaşanan hadisələrdən dərs çıxaran və gələcəyə yönəlmiş ortaq yanaşma ilə hərəkət etməyin vacibliyinə işarə edən dövlət başçısı R.T.Ərdoğan Türkiyənin regionda qeyri-sabitliyin təsirlərini azaltmaq və aradan qaldırmaq istiqamətində göstərdiyi səyləri də xatırladıb. Prezident R.T.Ərdoğan xüsusilə Ukrayna, Qəzza və Suriya başda olmaqla bir çox bölgədə sülh yönümlü təşəbbüslərin davam etdiyini bildirib.

Qeyd edək ki, toplantıda xarici işlər naziri Hakan Fidan, Prezident Administrasiyasının İctimaiyyətlə Əlaqələr İdarəsinin rəhbəri Burhanəddin Duran, Prezidentin baş müşaviri Akif Çağatay Kılıç və digər rəsmi şəxslər də iştirak ediblər.