Türkiyə Respublikasının xarici işlər naziri Hakan Fidan Ankarada Avropa İttifaqının Genişlənmə üzrə komissarı Marta Kos ilə görüşüb. Hər iki tərəf dəyişən geosiyasi şəraitdə dialoq və əməkdaşlığın gücləndirilməsinin zəruriliyini qeyd edib.
Fevralın 5-də keçirilən görüşdən sonra yayımlanan birgə yazılı açıqlamada H.Fidan və M.Kos Türkiyənin Aİ-yə namizəd statusunu təsdiqləyərək, regional sabitliyin və iqtisadi dayanıqlığın artırılmasında Türkiyə–Aİ münasibətlərinin strateji əhəmiyyətini vurğulayıblar.
Nazir H.Fidan ikitərəfli münasibətlərdə mövcud maneələrin gecikdirilmədən aradan qaldırılmalı olduğunu bildirərək, daha əhatəli, institusional və çoxşaxəli çərçivədə əməkdaşlığa çağırış edib.
Hər iki tərəf son dövrdə əldə olunan dinamikanı məmnunluqla qarşıladıqlarını qeyd edib və dialoqu konkret nəticələrə çevirmək öhdəliyini bir daha təsdiqləyib.
Açıqlamaya əsasən, ötən il qeydə alınan irəliləyişlər sırasında beş yüksək səviyyəli dialoq iclasının keçirilməsi, Türkiyənin müvəqqəti müdafiə altında olan qaçqınlara ev sahibliyi göstərməsi istiqamətində Aİ-nin davamlı dəstəyi, həmçinin Türkiyə vətəndaşlarının çoxgirişli “Şengen” vizasına çıxışının asanlaşdırılmasına yönəlmiş addımlar yer alıb.
Gömrük İttifaqı, hüququn aliliyi və regional məsələlər
Tərəflər, həmçinin son qlobal və regional hadisələrin Türkiyə–Aİ əməkdaşlığının strateji dəyərini daha da artırdığı barədə razılığa gəliblər.
Açıqlamada Qara dəniz, Cənubi Qafqaz və Mərkəzi Asiyada enerji, nəqliyyat, rəqəmsallaşma və ticarət yönümlü təhlükəsizlik və regional bağlantı sahəsində daha sıx koordinasiyanın əhəmiyyəti vurğulanıb.
Xarici işlər naziri Hakan Fidan qlobal ticarət dinamikasındakı dəyişiklikləri, geosiyasi qeyri-müəyyənliyi, təchizat zəncirindəki həssaslıqları, eləcə də yaşıl və rəqəmsal transformasiyanı əsas gətirərək Gömrük İttifaqının yenilənməsinin təcili olduğunu bildirib.
Hər iki tərəf rəqabət qabiliyyətini və iqtisadi dayanıqlığı dəstəkləmək məqsədilə Gömrük İttifaqının bütün potensialını üzə çıxarmağa yönəlmiş əməkdaşlığın davam etdirilməsi barədə razılıq əldə edib.
Açıqlamada bildirilib ki, tərəflər Avropa İnvestisiya Bankının Türkiyədə fəaliyyətinin mərhələli şəkildə yenidən başlamasını məmnuniyyətlə qarşılayıb və innovasiya yönümlü, davamlı layihələr üzrə əməkdaşlığı gücləndirmək niyyətlərini ifadə ediblər.
Marta Kos hüququn aliliyi və demokratik standartlarla bağlı dialoqun Türkiyə–Aİ münasibətlərinin ayrılmaz hissəsi olaraq qaldığını xatırladıb.
M.Kos həmçinin 2023-cü ildə Türkiyədə baş vermiş zəlzələlərin ildönümü münasibətilə Aİ-nin 1,2 milyard dollar həcmində fövqəladə yardım və yenidənqurma dəstəyi daxil olmaqla Türkiyə ilə həmrəylik nümayiş etdirdiyini qeyd edib.
H.Fidan isə Avropanın təhlükəsizliyi, sabitliyi və rifahı baxımından Türkiyə–Aİ həmrəyliyinin vacibliyini vurğulayıb.
