Hindistan Kəşmirdə turistlərə qarşı ölümcül hücumdan sonra Pakistana qarşı diplomatik tədbirlər görəcəyini açıqlayıb. Pakistan bildirib ki, hücum “saxta bayraq” əməliyyatı ola bilər.
Pakistan hökuməti Hindistanın mübahisəli Kəşmir əyalətində ölümcül hücumla bağlı diplomatik addımlarına cavab vermək üçün nadir təşkil edilən Milli Təhlükəsizlik Komitəsinin iclas keçirəcəyini bildirib.
Baş nazirin müavini və xarici işlər naziri İshaq Dar yüksək rütbəli mülki və hərbi məmurlardan ibarət olan və yalnız xarici təhdidlər və ya böyük terror hücumları hallarında toplaşan komitənin bu gün bir araya gələcəyini bildirib.
Bu bəyanat Hindistanın çərşənbə günü heç bir sübut təqdim etmədən Pakistanı "transsərhəd terroru dəstəkləməkdə" ittiham edərək bir sıra diplomatik tədbirlər görməsindən sonra verilib. Hindistan bu ittihamı nəzarətində olan Kəşmirdə turistlərə qarşı ölümcül hücumdan sonra səsləndirib.
Üsyançılar tərəfindən həyata keçirildiyi güman edilən hücum nüvə silahına malik iki ölkə arasında münasibətləri son illərdəki ən pis səviyyəyə çatdırıb. Ekspertlər hərbi əməliyyat riskinin hələ də qalmasından narahatlığını ifadə edərək, Yeni Dehlinin diplomatik addımının yalnız başlanğıc ola biləcəyini söyləyirlər.
Hindistanın tədbirləri arasında əsas su mübadiləsi sazişinin dayandırılması və əsas sərhəd keçidinin bağlanması daxildir. Hindistan bu tədbirləri Kəşmirin Hindistanın idarə etdiyi Pahalqam rayonunda naməlum silahlı şəxslərin turistlərə atəş açması və 26 nəfərin ölümündən bir gün sonra görüb. Bir Nepal vətəndaşı istisna olmaqla, öldürülənlərin hamısı Hindistan vətəndaşı elan edilib. Hücum son rübdə Himalay bölgəsində dinc sakinlərə qarşı ən qanlı hücum olub.
Hücum aprelin 22-də Himalay sahillərində, hindistanlı turistlər arasında məşhur olan Pahalqam şəhərində baş verib.
Şübhəli üsyançılar axtarılır
Hindistan polisi hücumun qiyamçılar tərəfindən planlaşdırıldığını iddia edib. Hücuma görə məsuliyyəti hələ heç bir qrup öz üzərinə götürməyib, Hindistan əsgərləri isə çərşənbə günü hücum edənləri axtarmağa davam ediblər.
Əraziyə on minlərlə polis və hərbçi cəlb edilib, əlavə nəzarət məntəqələri yaradılıb. Təhlükəsizlik qüvvələri maşınlarda, helikopterlərlə meşəlik dağlarda axtarış aparıb. Bəzi bölgələrdə keçmiş üsyançılar dindirilmək üçün polis bölmələrinə çağırılıb.
"Al Jazeera" agentliyinin xəbərinə görə, Hindistan polisi aprelin 22-də hücumla bağlı apardığı araşdırma çərçivəsində Cammu və Kəşmirdə azı 1500 nəfəri saxlayıb.
Əvvəllər naməlum üsyançı qrup olan Kəşmir Müqaviməti sosial mediada yayımladığı bəyanatda hücuma görə məsuliyyəti öz üzərinə götürüb. Qrup Hindistan səlahiyyətlilərinin problemli bölgədə 85,000-dən çox "əcnəbi" yerləşdirdiyini irəli sürüb və əlavə edib ki, aprelin 22-də hədəflənənlər "adi turistlər" deyil, "Hindistan təhlükəsizlik agentlikləri ilə əlaqədə olan" insanlardır.
Qrupun mesajları hələ müstəqil təşkilatlar tərəfindən təsdiqlənməyib.
Pakistan baş nazirinin müavini və xarici işlər naziri İshaq Dar Pakistanın hücumu Hindistanın sağçı hökumətinin "saxta bayraq" əməliyyatı kimi qiymətləndirdiyini və Hindistanın tədbirlərinə "qisas alacağını" söyləyib.
Pakistanın müdafiə naziri Xavaca Asif hadisəni "saxta bayraq əməliyyatı" kimi qiymətləndirib.
Pakistan mediasına açıqlama verən Asif "Biz bu vəziyyəti heç vaxt gözardı edə bilmərik, [saxta bayraq əməliyyatı] ehtimalı həmişə mövcud olacaq" deyib.
Kəşmir məsələsi
Kəşmirin Hindistanın nəzarətində olan hissəsində üsyançılar 1989-cu ildən Yeni Dehli hökumətinə qarşı döyüşürlər. Bir çox müsəlman kəşmirlilər bölgənin ya Pakistan hakimiyyəti altında birləşməsini, ya da müstəqil ölkə olmasını istəyirlər.
Hindistan Kəşmir qiyamını "Pakistanın dəstəklədiyi terror" adlandırır. Pakistan bu ittihamı rədd etsə də, bir çox kəşmirli hərəkatı qanuni azadlıq mübarizəsi kimi görür. Bölgədəki qarşıdurmalarda indiyədək on minlərlə dinc sakin, üsyançılar və hökumət təhlükəsizlik işçiləri həlak olub.
Hindistan əleyhinə üsyanların mərkəzi olan Kəşmir vadisində son vaxtlar zorakılığın azaldığı bildirilir.
Hökumət qüvvələri ilə üsyançılar arasında toqquşmalar əsasən Cammu bölgəsinin Rajouri, Poonç və Kathua kimi ucqar ərazilərinə keçib. Hindistan təhlükəsizlik qüvvələri bu ərazilərdə ölümcül hücumlarla üzləşib.
