İran prezidenti Məsud Pezeşkian ölkəsinə yönəlmiş iqtisadi təzyiqləri qeyd edərək, bunun İranın qazandığı "hərbi uğurlara" ziyan vura biləcəyini deyib.
Bu barədə M.Pezeşkian paytaxt Tehranda qatıldığı "Məhkəmə Hakimiyyəti Ali Şurası"nın iclasında gündəmdə olan məsələlərlə bağlı qiymətləndirmələr apardığı vaxt danışıb.
"Düşmənə" qarşı qətiyyətli mövqe nümayiş etdirildikdə cəmiyyətin müəyyən çətinliklərlə qarşılaşma ehtimalının olduğunu bildirən prezident M.Pezeşkian müharibənin Novruz bayramı və Ramazan ayı ilə eyni dövrə təsadüf etdiyini qeyd edib. O, bu səbəbdən bazarlarda məhsul qıtlığı yaşanmasa da, bəzi malların qiymətində artım olduğunu vurğulayıb. İran dövlət başçısı bu vəziyyətin hökumətin diqqətsizliyindən deyil, iqtisadi şərait və müəyyən məhdudiyyətlərdən qaynaqlandığını dilə gətirib.
Ölkəsinin hazırda "tammiqyaslı bir müharibə şəraitində" olduğuna diqqət çəkən M.Pezeşkian deyib: "İqtisadi təzyiqlər hərbi uğurlarımıza ziyan vura bilər. Silahlı qüvvələr ölkəni fədakarlıqla müdafiə edir. Lakin iqtisadi təzyiqlər ictimai narazılıqların formalaşmasına yol açır. Bu narazılıqlar genişlənərsə, xalqın hökumətə verdiyi sosial dəstək zərər görə bilər."
