Amerika Birləşmiş Ştatları Prezidenti Donald Trampın polad və alüminium məhsullarının idxalına tətbiq etdiyi gömrük rüsumları qüvvəyə minib. Bu addım Avropanın sürətli cavab tədbirləri ilə qarşılanıb.
Məlumata görə, Donald Tramp xaricdən ölkəyə polad və alüminium idxalına 25% gömrük rüsumu tətbiq etməyi tapşırıb. Rüsumlar metaldan istehsal edilən yüzlərlə məhsula şamil olunacaq.
Avropa Komissiyası cavab tədbirləri olaraq, gələn aydan etibarən ABŞ məhsullarına 26 milyard avro (28 milyard dollar) dəyərində əks-gömrük rüsumları tətbiq edəcəyini açıqlayıb.
ABŞ-ın yaxın müttəfiqləri olan Kanada, Böyük Britaniya və Avstraliya bu ümumi rüsumları tənqid edib. Kanada qarşılıqlı tədbirlər görməyi nəzərdən keçirdiyini, Böyük Britaniyanın Biznes və Ticarət Naziri Conatan Reynolds isə milli maraqlar naminə "bütün variantların masada olduğunu" bildirib.
Qeyd edək ki, Donald Tramp çərşənbə axşamı Kanadanı polad və alüminium ixracına tətbiq olunan rüsumları 50 faizə qədər artırmaqla hədələyib.
Lakin Tramp, Ontario əyalətinin baş naziri Daq Fordun Minnesota, Miçiqan və Nyu-York ştatlarına elektrik ixracına tətbiq etdiyi 25 faiz əlavə rüsumu dayandırma qərarından sonra bu planından vaz keçib.
Ağ Ev sözçüsü, ABŞ-ın Kanadaya təzyiqini Amerika xalqı üçün "qələbə" kimi qiymətləndirib.
ABŞ Gömrük və Sərhəd Mühafizəsi agentliyi, rüsumların qüvvəyə minməsindən əvvəl kvota tənzimləmələri çərçivəsində gömrük rüsumlarından azad idxalları dayandırıb və göndərənlərə bildiriş göndərərək, kvota sənədlərinin çərşənbə axşamı yerli vaxtla saat 16:30-a qədər ABŞ limanlarında təqdim olunmalı olduğunu, əks halda tam rüsumların tətbiq olunacağını bildirib.
Sənaye qrupları rüsumların bərpasını alqışlayır
Bu addım, ABŞ polad istehsalçıları tərəfindən Trampın 2018-ci ildə tətbiq etdiyi, lakin müxtəlif ölkələrə verilən istisnalar və kvotalar, eləcə də məhsul-spesifik istisnalarla zəiflədilmiş metal rüsumlarını bərpa etmək kimi qiymətləndirilib.
"Prezident Tramp illərdir istismar olunan rüsum boşluqlarını tamamlayaraq, Amerikanın polad sənayesini yenidən gücləndirəcək," – deyə Polad İstehsalçıları Assosiasiyasının prezidenti Filip Bell bəyanatında bildirib.
Filip Bell qeyd edib ki, yenilənmiş rüsumlar ABŞ-dakı polad istehsalçılarının yeni iş yerləri yaratmasına və daha böyük sərmayələr qoymağa davam etmələrinə imkan verəcək.
Kanadanın energetika naziri Conatan Uilkinson, Reuters-ə verdiyi müsahibədə bildirib ki, əgər ABŞ rüsumlarını davam etdirərsə, Kanada ABŞ-a neft ixracını məhdudlaşdırmaq və ya mineralların ixracına rüsumlar tətbiq etmək kimi qarşılıqlı tədbirlər görə bilər.
Çin, alüminium və alüminiumdan istehsal edilən məhsulların ikinci ən böyük tədarükçüsüdür. Ölkə, Donald Trampın ötən ay fentanil ticarəti ilə əlaqədar tətbiq etdiyi yeni 20 faiz rüsumuna məruz qalıb.
