Cənub-Şərqi Asiyada yerləşən Tayland və İndoneziyada yağan aramsız yağışlar daşqınlar və torpaq sürüşmələrinə səbəb olmağa davam edir. Təbii fəlakət onlarla insanın ölümünə və minlərlə insanın evlərini tərk etməsinə səbəb olub.

Hər iki ölkənin hakimiyyət orqanları musson yağışlarının və qeyri-sabit hava şəraitinin əhali üçün təhlükə yaratdığı barədə xəbərdarlıq edir.

Taylandda daşqınlar nəticəsində ölənlərin sayının 33-ə çatdığı bildirilir. Hökumət sözçüsü Siriponq Ankasakulkiat bildirib ki, insanlar torpaq sürüşmələri və elektrik cərəyanı vurması nəticəsində həlak olublar.

Rəsmilərin məlumatına görə, İndoneziyanın Sumatra adasında aramsız yağışların səbəb olduğu daşqınlar və torpaq sürüşmələri nəticəsində ən azı səkkiz nəfər həyatını itirib, onlarla insan yaralanıb.

Milli Fəlakət Agentliyi bildirib ki, Sumatranın şimalında hökm sürən qeyri-sabit hava şəraiti Tapanuli Selatan rayonunun bəzi hissələrinin su altında qalmasına səbəb olub. Agentliyin sözçüsü Əbdül Muhari deyib:“Tapanuli Selatan rayonunda baş verən daşqınlar və torpaq sürüşmələri səkkiz nəfərin ölümünə, 58 nəfərin yaralanmasına və 2 851 sakinin təxliyə edilməsinə səbəb olub”. Agentlik həmçinin qeyd edib ki, dağıntıları təmizləmək üçün bölgəyə ağır texnika göndərilib.

Əyalətdəki azı üç rayon da daşqın və torpaq sürüşmələrindən təsirlənib.

Meteorologiya, İqlim və Geofizika Agentliyi bildirir ki, ekstremal hava hadisələri tropik siklonlara çevrilə biləcək hava şəraiti ilə əlaqədardır. Adətən iyun–sentyabr aylarında hökm sürən musson mövsümü tez-tez güclü yağışlarla müşayiət olunur və torpaq sürüşmələrinə, qəfil daşqınlara, həmçinin su yolu ilə yayılan xəstəliklərə səbəb olur.

İqlim dəyişikliyi isə mövsümlərin müddəti və intensivliyini dəyişdirərək daha çox yağışa, qəfil daşqınlara və güclü küləklərə yol açır.

Bu ay Mərkəzi Yavada güclü yağışların səbəb olduğu torpaq sürüşmələrində ən azı 38 nəfər ölüb, təxminən 13 nəfər isə itkin düşüb.