Güclü yağışlar və qasırğa nəticəsində Vyetnamda genişmiqyaslı daşqınlar və torpaq sürüşmələri meydana gəlib. Hadisə nəticəsində ölənlərin sayı 19-a yüksəldib. Həmçinin itkin düşənlərlə bağlı məlumatlar da daxil olub.

Ölkənin Milli Hidrometeorologiya Xidməti açıqlayıb ki, son 24 saat ərzində Vyetnamın bəzi bölgələrində yağıntı 30 santimetri aşıb. Qurum əlavə olaraq güclü yağışların davam edəcəyi barədə əhaliyə xəbərdarlıq edib.

Uzunmüddətli yağışlar Şonla və Laokay əyalətlərinin şimal dağlıq bölgələrindən başlayaraq Nqean əyalətinin mərkəzi rayonlarına qədər ani daşqınlara və torpaq sürüşmələrinə səbəb olub, yolları bağlayaraq yaşayış məntəqələrini təcrid vəziyyətinə salıb.

Aramsız yağış və güçlü sel şimalda genişmiqyaslı daşqın və torpaq sürüşmələrinə yol açıb. Yenbay əyalətində yerləşən Tao çayı gecə saatlarında fövqəladə vəziyyət həddini aşaraq ətrafdaki evləri su altında qoyub.

Onlarla ölən və itkin düşən

Paytaxt Hanoyda bir çox küçələr sular altında qalıb. Rəsmilər çay ətrafı yaşayış məntəqələrində məskunlaşmış sakinləri qabaqlayıcı tədbirlər görməyə çağırıb. Dövlət mediası xəbər verib ki, sentyabrın 30-u etibarilə xilasedicilər, aralarında 8 balıqçının da olduğu 13 nəfəri tapmaq üçün axtarışları davam etdirir.

Xatırladaq ki, “Bualoy” qasırğası bundan əvvəl sentyabrın 26-da başlayaraq Filippinlərdə təxminən 20 nəfərin ölümünə səbəb olmuşdu. Qasırğa sentyabrın 29-u səhər Vyetnam sahillərinə çatıb və bölgəyə xeyli ziyan vurub.

Mütəxəssislərin sözlərinə görə, qlobal istiləşmə bu cür qasırğaların təsirini daha da gücləndirir. Çünki okean sularının isinməsi tropik qasırğalara daha çox təkan verərək şiddətli küləklərə, güclü yağışlara və Şərqi Asiyada yağış normasının dəyişməsinə səbəb olur.