İran İslam İnqilabı Keşikçiləri Korpusu (SEPAH) bildirib ki, ABŞ prezidenti Donald Tramp İranla "qeyri-mümkün" müharibə və ya "pis razılaşma" arasında seçim etməlidir.

Mayın 3-də "X" platformasında edilən paylaşımda SEPAH-ın kəşfiyyat idarəsi qeyd edib ki, Tehran İran limanlarının blokadasını qaldırması üçün ABŞ ordusuna müddət tanıyıb.

Paylaşımda həmçinin Avropa, Çin və Rusiyanın Vaşinqtona qarşı daha tənqidi mövqe nümayiş etdirdiyi vurğulanıb.

Qeyd edək ki, ABŞ və İsrail fevralın 28-də İrana hücumlar təşkil etmiş, bu isə Tehranın İsrailə və Körfəzdəki ABŞ müttəfiqlərinə qarşı cavab tədbirləri görməsinə və Hörmüz boğazının bağlanmasına səbəb olmuşdu.

Aprelin 13-dən bəri ABŞ strateji su yolunda İranın dəniz nəqliyyatını hədəf alan dəniz blokadası tətbiq edir.

Aprelin 8-də Pakistanın vasitəçiliyi ilə iki həftəlik atəşkəs elan edilib; bunun ardınca aprelin 11-də İslamabadda birbaşa danışıqlar aparılsa da, daimi atəşkəs barədə razılıq əldə olunmayıb.

Daha sonra Tramp Pakistanın tələbi ilə atəşkəs rejimini yeni bir müddət təyin etmədən uzadıb.

İran Hörmüz boğazının açılması, ABŞ-nin dəniz blokadasının dayandırılması və həm İran, həm də Livandakı müharibənin tamamilə bitirilməsi üçün nəzərdə tutulan razılaşma danışıqlarına bir ay vaxt təyin edib.

Rəsmi Tehran çərçivə sazişi üçün yenidən işlənmiş 14 maddəlik təklifini mayın 2-də Vaşinqtona təqdim edib.