Ukraynadakı regional rəsmilər Rusiya qüvvələrinin həyata keçirdiyi genişmiqyaslı hücumların çox sayda insanın ölümünə səbəb olduğunu bildiriblər.
Kiyev hərbi administrasiyasının rəhbəri Timur Tkaçenko "Telegram"da etdiyi paylaşımda "Kiyevdə aralarında bir uşağın da olduğu 23 yaralının olduğu məlumdur. Təəssüf ki, ölü sayı dördə yüksəldi" deyib.
Daxili işlər naziri İqor Klimenko daha əvvəl Ukraynanın şimal-şərqindəki Xarkov şəhərində "yanğınsöndürmə əməliyyatları zamanı Dövlət Fövqəladə Hallar Xidmətinin beş xilasedicisinin öldüyünü" söyləmişdi.
Klimenko "Telegram"da etdiyi paylaşımda "Ən azı 5 nəfər də yaralandı," deyərək ölüm hallarının Rusiyanın hücumları nəticəsində baş verdiyini bildirib.
Kiyev kafedralı alov alıb
Kiyev şəhər meri Vitali Kliçko verdiyi açıqlamada Kiyev-Peçersk Lavranın məşhur Pravoslav kompleksindəki Məryəm Ananın Vəfatı Kafedralının Rusiya hücumlarından sonra alov aldığını söyləyib.
Vitali Kliçko "Telegram"dakı paylaşımında “Kiyev-Peçersk lavrasında yanğın baş verdi. Məryəm Ananın Vəfatı Kafedralının damı yanır," deyə yazıb. Bu əsnada Kiyev də daxil olmaqla Ukraynadakı bir çox böyük şəhər hücum altında idi.
Ukraynanın həyata keçirdiyi pilotsuz uçuş aparatı hücumları isə Moskvanın təxminən 200 kilometr cənubundakı Tula şəhərində üç nəfərin ölümünə və üç nəfərin yaralanmasına səbəb olub.
Region qubernatoru verdiyi açıqlamada "Bu gecə Tula şəhərətrafı bölgəsinin yaşayış sahəsi pilotsuz uçuş aparatının hücumuna məruz qaldı. Təəssüf ki, ilkin məlumatlara görə üç nəfər öldü. Aralarında bir yaşında uşağın da olduğu üç nəfər də yaralandı" deyib.
