Türkiyə prezidenti Rəcəb Tayyib Ərdoğan bildirib ki, 2024-cü il Türkiyə üçün əhəmiyyətli nailiyyətlər ili olub. O, bu sözləri Türkiyə İxracatçılar Məclisi (TİM) tərəfindən təşkil olunan tədbirdə çıxışı zamanı ötən ilin ixrac həcmlərinə istinad edərək vurğulayıb.
2024-cü ildə ən çox ixrac edən ilk 10 şirkət avtomobil sənayesində fəaliyyət göstərən “Ford”, “Toyota”, Türkiyə Petrol Rafineriləri, “Kibar Dış Ticaret”, “Star Rafineri”, “TGS Dış Ticaret”, “Oyak-Renault”, “Vestel”, “Arçelik” və “Baykar” olub.
Prezident Ərdoğan qeyd edib ki, Türkiyə iqtisadiyyatı 2024-cü ildə investisiya, məşğulluq, istehsal və ixracata yönəlmiş inkişaf strategiyası nəticəsində 3,2 faiz böyüyüb və bu dinamika 2025-ci ildə də davam edəcək. O, bu ilin birinci rübündə Türkiyə iqtisadiyyatının əvvəlki ilə nisbətən 2 faiz artdığını və bunun ardıcıl 19-cu rüb dayanmadan inkişaf olduğunu diqqətə çatdırıb.
R.T.Ərdoğan orta müddətli iqtisadi proqramın ölkənin struktur möhkəmliyini artıraraq xarici mənbələrdən asılılığını azaltdığını və Türkiyənin zəifliklərini minimuma endirdiyini vurğulayıb. O qeyd edib ki, may ayının əvvəlindən etibarən Türkiyənin ehtiyatları yenidən artmağa başlayıb. Ərdoğan vurğulayıb ki, Türkiyə türk lirəsinə olan inam artır.
2024-cü ilin ixracat üçün rekord il olduğunu söyləyən Türkiyə prezidenti deyib: “Keçən il 262 milyard dollar ixracatla rekord qırdıq. Qlobal ixracat payımızı 1,07 faizə yüksəltdik. 2024-cü ildə 1 milyard dollarlıq və daha çox ixracat həyata keçirən şirkətlərin sayı 18-ə, 100 milyon dollardan artıq satış edən şirkətlərin sayı isə 302-yə çatdı. 2025-ci ildə də eyni sürətlə böyüməyə davam edəcəyik. May ayında ixracat 24,8 milyard dollara çataraq keçən ilin eyni ayına nisbətən 2,7 faiz artıb. Bu rəqəm respublikanın ən yüksək aylıq ixracatıdır.
Biz müdafiə və aviasiya, ağ əşyalar, avtomobil və enerji də daxil olmaqla bir çox sektorda dünyanın aparıcı istehsalçılarından biriyik.
2002-ci ildə Türkiyənin müdafiə və aviasiya ixracatı 248 milyon dollarlıq idi, 2024-cü ildə isə müdafiə məhsullarından dövriyyəsi 15 milyard dolları keçdi. 180 fərqli ölkə və bölgəyə 6,7 milyard dollarlıq məhsul ixrac edildi. Bu, qürur mənbəyidir.
NATO və xidmət ixracatı daxil edildikdə, Türkiyənin ümumi ixracatı 7,1 milyard dollara çatıb.
Biz silahlı və silahsız pilotsuz uçuş aparatlarında (PUA) dünyanın aparıcı ölkələrindən biri olmağı bacardıq. Türkiyə şirkətləri dünyada satılan hər üç PUA-dan ikisini istehsal edir. Zirehli quru nəqliyyat vasitələrində də Türkiyə qlobal marka olub.
Ümid edirik ki, pilotsuz uçuş aparatlarında qazandığımız qlobal uğuru döyüş təyyarələrində də əldə edəcəyik.”
