Türkiyənin BMT-dəki daimi nümayəndəsi səfir Ahmet Yıldız: "Geniş yayılmış coğrafi termini siyasiləşdirmək cəhdləri konstruktiv dialoqa, regional sabitliyə və ya 1936-cı il Montre Konvensiyası rejiminin düzgün başa düşülməsinə töhfə vermir" deyib.
Türkiyənin Birləşmiş Millətlər Təşkilatındakı (BMT) daimi nümayəndəsi, səfir Ahmet Yıldız Yunanıstanın "Türkiyə boğazları" termininin işlədilməsinə etirazını rədd edən məktub yazaraq, Yunanıstanın bu mövqeyinin "daxili siyasi maraqlara xidmət etmək məqsədi daşıdığını" və bunu "təəssüf doğurucu" hesab etdiklərini bildirib.
Ahmet Yıldız mayın 8-də BMT-nin Baş katibi Antonio Quterreşə və Təhlükəsizlik Şurasının sədri Fu Tsonqa ünvanlanmış məktubda Yunanıstanın Təhlükəsizlik Şurasının 29 aprel tarixli son iclasındakı etirazının diqqəti müzakirə olunan mühüm mövzulardan yayındırdığını və iclasın məqsədlərinə töhfə verməkdənsə, daxili siyasi maraqlara xidmət etmək məqsədi daşıdığını qeyd edib.
Yıldız məktubunda "Türkiyə Yunanıstanın əsassız iddialarını qətiyyətlə və tamamilə rədd edir. Geniş yayılmış coğrafi termini siyasiləşdirmək cəhdləri konstruktiv dialoqa, regional sabitliyə və ya 1936-cı il Montre Konvensiyası rejiminin düzgün başa düşülməsinə töhfə vermir", -deyə bildirib.
Səfir "Türk boğazları" termininin hər ikisi Türkiyənin suverenliyi altında olan İstanbul boğazı və Çanaqqala boğazını birlikdə ifadə edən "yerləşmiş coğrafi ifadə" olduğunu vurğulayıb.
Məktubda “Türkiyə boğazları termini təsviredici, coğrafi baxımdan dəqiqdir və Montre Konvensiyasının davam edən tətbiqi ilə tam uyğundur", -deyə qeyd edilib.
Yıldız "Türkiyə boğazları" termininin Beynəlxalq Dəniz Təşkilatı (IMO) və NATO-nun qərar və sənədləri də daxil olmaqla çoxsaylı beynəlxalq sənədlərdə ənənəvi və ardıcıl olaraq istifadə edildiyini vurğulayıb və Yunanıstanın "Türkiyə boğazları"ndan başqa bir termin tətbiq etmək cəhdlərinin yalnız onun "tarixi istəkləri" ilə izah edilə biləcəyini bildirib və əlavə edib ki, bu cür səylər su yollarının hüquqi və ya siyasi statusunu dəyişdirməyəcək.
Məktub Yunanıstanın BMT Təhlükəsizlik Şurasında "dənizçilik sahəsində su yollarının təhlükəsizliyi və qorunması" mövzusunda keçirilən iclasda Ahmet Yıldızın İstanbul və Çanaqqala boğazlarını "Türkiyə boğazları" adlandırmasına etiraz etməsindən sonra ünvanlanıb.
Yunanıstan Şuraya təqdim etdiyi digər bir açıqlamada "Türkiyə boğazları" termininin "Boğazlar rejiminə dair 1936-cı il Montre Konvensiyası ilə uyğun olmadığını" iddia edib.
Yunanıstan konvensiyada istifadə olunan terminologiyanın sadəcə "Boğazlar" olduğunu müdafiə edib.
