Amerika Birləşmiş Ştatlarının Prezidenti Donald Tramp çərşənbə axşamı Rusiya Prezidenti Vladimir Putinlə Ukraynadakı müharibənin sona çatdırılması ilə bağlı görüş keçirməyi planlaşdırdığını bildirib. O, münaqişə tərəfləri arasında müəyyən aktivlərin bölüşdürülməsi ilə bağlı müzakirələrin davam etdiyini də vurğulayıb.
ABŞ rəsmiləri bazar günü Səudiyyə Ərəbistanında keçirilən danışıqlardan sonra Vaşinqtonun üç ildir davam edən müharibəyə fasilə verməyi təklif etməsindən sonra, Ukrayna ilə Rusiya arasında atəşkəs razılaşmasının yaxın həftələr ərzində əldə edilə biləcəyinə dair nikbin mesajlar veriblər.
Donald Tramp deyib: "Düşünürəm ki, biz torpaq və enerji stansiyaları barədə danışacağıq. Hesab edirəm ki, tərəflər bu mövzuları artıq dəfələrlə müzakirə ediblər. Biz artıq müəyyən aktivlərin bölüşdürülməsi məsələsini müzakirə edirik."
Rəsmi Vaşinqton və Kiyevin Avropa müttəfiqləri Moskvanı döyüşlərin dayandırılmasına razı salmağa çalışırlar, lakin Putin bu təklifə aydın cavab verməyib. Əksinə, o, bir sıra şərtlər irəli sürərək təkliflə bağlı "ciddi suallar" gündəmə gətirib.
Trampın münaqişə üzrə xüsusi nümayəndəsi Stiv Vitkof CNN-ə müsahibəsində bildirib ki, prezidentlərin bu həftə çox yaxşı və müsbət müzakirələr aparacaqlarını düşünür. Donald Tramp yaxın həftələrdə hər hansı bir razılaşmanın əldə olunmasını gözləyir və bunun mümkün olduğuna inandığını vurğulayıb.
Ukrayna Prezidenti Volodimir Zelenski şənbə günü Kremlin müharibəni bitirmək istəmədiyini iddia edib. O, bildirib ki, Moskva hər hansı bir atəşkəsə razılaşmadan əvvəl döyüş meydanındakı vəziyyətlərini yaxşılaşdırmaq istəyir.
Marko Rubio və Sergey Lavrov arasında görüş baş tutub
sammitində əldə edilən razılaşmaların konkret aspektlərini müzakirə etmək üçün Rusiya Xarici İşlər Naziri Sergey Lavrovla əlaqə saxladığını açıqlayıb.
Qeyd edək ki, fevral ayında Riyadda keçirilən görüş, Moskvanın 2022-ci ilin fevralında hücuma başlamasından sonra ABŞ və Rusiya arasında ilk yüksək səviyyəli görüş olmuşdu.
Rusiya Xarici İşlər Nazirliyi Sergey Lavrov və Marko Rubionun görüşləri davam etdirmək mövzusunda razılıq əldə etdiklərini bildirsə də, ABŞ-ın təklif etdiyi atəşkəsdən bəhs edilməyib.
Dövlət Departamentinin sözçüsü Temmi Brüs şənbə günü bildirib ki, tərəflər Ukrayna ilə bağlı növbəti addımları müzakirə ediblər və ABŞ ilə Rusiya arasındakı əlaqələrin bərpası istiqamətində işləri davam etdirmək barədə razılığa gəliblər.
