Dövlət Departamenti bildirib ki, konsulluq işçiləri üçün qlobal təlim proqramı başladılarkən viza görüşləri dünya miqyasında təşkil ediləcək.
ABŞ Prezidenti Donald Trampın administrasiyası dünya miqyasında müraciətçilər üçün viza görüşlərini dayandırıb.
ABŞ Dövlət Departamentinin sözçüsü avqustun 25-də bildirib ki, onlar bütün dünyada ABŞ səfirlikləri və konsulluqlarında qlobal təlim təşəbbüsü başlayıblar və bu təlimə uyğun olaraq viza xidmətləri üçün görüşlər yenidən planlaşdırılacaq.
Tramp administrasiyası bildirir ki, məqsəd daxili təhlükəsizliyi gücləndirməkdir.
Viza siyasətinin sərtləşdirilməsi bəzi hüquqi maneələrlə üzləşib. Avqustun 21-də ABŞ hakimi Tramp administrasiyasının 75 ölkədən olan müraciətçilərə miqrant vizalarının verilməsini dayandıran siyasətini ləğv edərək, bu siyasətin Dövlət katibi Marko Rubionun hüquqi səlahiyyətlərini aşdığını bildirib.
Departament təlim və onun cədvəli barədə ətraflı məlumat verməyib; yalnız bildirib ki, təlim konsulluq işçilərinə ABŞ-ın ictimai yardımından asılı olacağı ehtimal olunan namizədləri süzgəcdən keçirməyə və viza müraciətlərini "əhatəli və ardıcıl" şəkildə qiymətləndirməyə kömək etməyi hədəfləyir.
Daha firavan Amerika
Viza görüşlərinin dayandırılması barədə ilk məlumatı avqustun 25-də "Financial Times" verib. Qəzet bildirib ki, ABŞ səfirlikləri və konsulluqlarında müsahibəsi təyin olunmuş miqrant viza müraciətçilərinin görüşləri yenidən planlaşdırılıb
"Daha firavan Amerika o deməkdir ki, viza müraciətçilərinin ABŞ qanunları və qaydaları ilə müəyyən edilən ictimai yükə çevrilmə ehtimalı azdır və ehtiyacı olan, tələb olunan şərtlərə cavab verən amerikalılar üçün nəzərdə tutulmuş ABŞ ictimai yardımından asılı qalma ehtimalı da azdır," deyə Dövlət Departamentinin sözçüsü "Financial Times"a bildirib.
ABŞ-nin sərt miqrasiya tədbirləri insan haqları təşkilatları tərəfindən ayrı-seçkilik kimi və ifadə azadlığı ilə ədalətli məhkəmə hüquqlarının pozulması kimi geniş şəkildə pislənilib.
İnsan haqları müdafiəçiləri həmçinin bildirirlər ki, siyasətin sərtləşdirilməsi ABŞ-də, xüsusilə irqi profilləşmə ilə bağlı narahatlıqlarını ifadə edən etnik azlıqlar üçün təhlükəsiz olmayan bir mühit yaradıb.
