Amerika Birləşmiş Ştatlarının prezidenti Donald Tramp İranla sülh danışıqları mövzusunda İsrailin Baş naziri Benyamin Netanyahuya xəbərdarlıq edib.

D.Tramp iyunun 16-da Fransada keçirilən G7 sammiti çərçivəsində verdiyi bəyanatda deyib: "Birisini axtarmaq üçün hər dəfə bütöv bir yaşayış binasını dağıtmağa ehtiyac yoxdur. Çünki həmin binalarda çoxlu sayda insan var və onların hamısı Hizbullah üzvü deyil."

Həmçinin D.Tramp verdiyi müsahibədə B.Netanyahunun qərarlarını kəskin dillə tənqid edərək "Mən olmasaydım, İsrail deyə bir şey olmazdı", – deyə vurğulayıb və onu "dəli" adlandırıb.

Qeyd edək ki, B.Netanyahunun rəhbərliyi dövründə ABŞ-da dörd prezident dəyişib və o, onların hamısının qəzəbinə səbəb olub. Lakin həmin rəhbərlərdən heç biri bunu D.Tramp qədər açıq şəkildə dilə gətirməyib.

Bu gərginlik D.Trampın rəsmi Vaşinqton ilə Tehran rəhbərliyi arasındakı müzakirələri pozmaq riski daşıyan İsrailin Livandakı son hücumlarını tənqid etməsindən sonra yaranıb.

Müharibənin cəmiyyət tərəfindən dəstəklənməməsi və benzin qiymətlərini artırması səbəbindən daxili siyasətdə etirazlarla qarşılaşan D.Tramp hökuməti sazişin əldə olunması istiqamətində səylərini daha da gücləndirir.

G7 sammitində D.Trampdan B.Netanyahuya sərt reaksiya

Rəsmi Vaşinqton ilə Tehran hakimiyyəti arasında müharibəyə son qoymağı hədəfləyən sazişin iyunun 19-da Cenevrədə imzalanması planlaşdırılır.

Fransada keçirilən G7 sammitində çıxış edən Donald Tramp son dövrlərdə atdığı addımlardan məmnun olmadığını B.Netanyahuya çatdırdığını bildirib.

D.Tramp deyib: "ABŞ olmasaydı, İsrail olmazdı. Mən olmasaydım da İsrail olmazdı, çünki məndən əvvəl heç bir prezident mənim etdiklərimi etməyə cəsarət göstərməyib. B.Netanyahu ilə çox yaxşı münasibətimiz var idi. Lakin artıq o, Livan məsələsində daha məsuliyyətli davranmalıdır."