Türkiyənin xarici işlər naziri Hakan Fidan Misirə rəsmi səfərindən sonra sosial media hesabında paylaşım edib.

Nazir bildirib ki, Türkiyə və Misir üzərilərinə düşən məsuliyyəti dərk edən iki böyük dövlətdir. O vurğulayıb ki, iki ölkə arasında əməkdaşlığın güclənməsi yalnız xalqların ortaq maraqlarına deyil, həm də regionda sülhün, sabitliyin və rifahın bərqərar olmasına xidmət edir. H.Fidan prezidentlərin ortaya qoyduğu vizyona uyğun olaraq, qarşılıqlı etimad və ortaq maraqlar əsasında çiyin-çiyinə işləməyə və əlaqələri dərinləşdirməyə davam edəcəklərini qeyd edib.

Səfərin ikitərəfli əməkdaşlığın yüksək səviyyəsini və regional məsələləri müzakirə etmək üçün çox vacib imkan yaratdığını deyən nazir göstərilən səmimi qonaqpərvərliyə görə misirli həmkarı Bədr Əbdülətiyə təşəkkür edib.

Hakan Fidan səfər çərçivəsində misirli həmkarı ilə birgə Türkiyə-Misir Birgə Planlaşdırma Qrupunun ikinci görüşünə həmsədrlik etdiyini bildirib. O, həmçinin Misir Baş Kəşfiyyat Xidmətinin rəhbəri Həsən Rəşad və Ərəb Liqasının baş katibi ilə görüşlər keçirdiklərini diqqətə çatdırıb. Nazir ticarət dövriyyəsini artıracaq, iqtisadi əlaqələri şaxələndirəcək və ölkələr arasında əlaqəni gücləndirəcək sazişlərin imzalandığını vurğulayıb.

Xatırladaq ki, Hakan Fidan 13-14 avqust tarixlərində Misirə rəsmi səfər edib.