Yerli mətbuatda yayılan məlumatlara əsasən, ABŞ ordusunun həftə sonu İranın nüvə obyektlərinə təşkil etdiyi hücumun ardından Nyu-York şəhərində hüquq-mühafizə orqanları yüksək səviyyədə xəbərdarlıq vəziyyətinə gətirilib. Lakin şəhərə yönəlmiş konkret bir təhlükə qeydə alınmayıb.
Nyu-York şəhərinin meri Erik Adams “NBC News”a verdiyi açıqlamada deyib: “Şəhərə qarşı birbaşa təhdid yoxdur, ancaq hәr bir halda daim ayıq olmaq lazımdır.”
E.Adams qeyd edib ki, Nyu-York Polis İdarəsi (NYPD) federal tərəfdaşlarla sıx əməkdaşlıq edərək, yəhudi və fars icmalarına məxsus mərkəzlər, eləcə də Tayms-skver meydanı kimi sıxlıq olan ərazilərdə müşahidə və təhlükəsizlik tədbirlərini gücləndirib.
İranın mümkün cavab hücumları narahatlıq doğurur
Rəsmilər bildirirlər ki, hücumlardan sonra İranın mümkün cavab tədbirlərinə dair artan narahatlıqlar fonunda ABŞ infrastrukturunu hədəf ala biləcək potensial kiber hücumlar da diqqətlə izlənilir.
İctimai Təhlükəsizlik üzrə merin müavini Kaz Dotri vurğulayıb ki, ictimai təhlükəsizlik idarənin əsas prioriteti olaraq qalmaqdadır. Bundan әlavә o, Nyu-York sakinlərini gündəlik həyatlarına davam etməyə çağırıb.
Şəhər rəhbərliyi sakinləri ayıq olmağa və hər cür şübhəli fəaliyyət barədə məlumat verməyə çağırıb.
Qeyd edək ki, bu xəbərdarlıqlar ABŞ qüvvələrinin iyunun 22-dә səhər saatlarında İranın Fordo, Natanz və İsfahan şəhərlərində yerləşən nüvə obyektlərinə bir sıra hücumlar həyata keçirməsindən sonra verilib. Bu hücumlar bölgədə daha genişmiqyaslı qarşıdurma təhlükəsi ilə bağlı narahatlıqları artırıb.
