Türkiyə Respublikasının xarici işlər naziri Hakan Fidan qeyd edib ki, İsrail təhlükəsizliyi bəhanə gətirərək daha çox ərazini işğal etməyə çalışır. Bu barədə nazir H.Fidan aprelin 18-də (bu gün) Antalya Diplomatiya Forumunda çıxışı sırasında deyib:

“İsrail öz təhlükəsizliyinin arxasınca getmir. İsrail daha çox ərazi əldə etmək niyyətindədir. Təhlükəsizlik B.Netanyahu hökuməti tərəfindən daha çox torpağın işğal edilməsi üçün bəhanə kimi istifadə olunur. İsrail beynəlxalq müstəvidə öz təhlükəsizliyini müdafiə etdiyi təəssüratını yaradıb, lakin xüsusilə son illərdə bundan daha artıq şeylər törətdiyi açıq şəkildə görünür.”

H.Fidan qeyd edib ki, Fələstin torpaqlarından Qəzzaya, işğal altındakı İordan çayının qərb sahilindən, Şərqi Qüdsə və hazırda isə Livan və Suriyaya doğru baş verənlər regionda “irəliləyən işğal və genişlənmə siyasəti” xarakteri daşıyır.

Türkiyə XİN rəhbəri H.Fidan əlavə edərək deyib: “Bunun dayanmalı olduğunu düşünürəm. İsrail başa düşməlidir ki, regionda sülh şəraitində yaşamağın yeganə yolu digər ölkələrin öz təhlükəsizliklərini, ərazi bütövlüklərini və azadlıqlarını qorumasına imkan verməkdir; bu ölkələrə qarşı güc tətbiq etmək deyil.”