“Anadolu” xəbər agentliyinə müsahibə verən bir mənbə bildirib ki, Ağ Ev Coel Reybernin dövlət katibinin Yaxın Şərq mәsәlәlәri üzrə köməkçisi vəzifəsinə namizədliyini geri götürüb.

Adının açıqlanmasını istəməyən mənbənin sözlərinə görə, C. Reybernin namizədliyi qanunvericilərdən kifayət qədər dəstək almadığı üçün geri çəkilib. Administrasiyanın bu vəzifəyə alternativ namizəd irəli sürməsi gözlənilir.

Coel Reybern 2018–2021-ci illərdə ABŞ prezidenti Donald Trampın Suriya üzrə xüsusi nümayəndəsi vəzifəsində çalışıb. O, eyni zamanda 2020-ci ilin noyabr ayına qədər Levant işləri üzrə dövlət katibinin köməkçisi vəzifəsini də icra edib.

Coel Reybernin yeni vəzifəyə təyin olunması ilə bağlı Senatda tərəddüdlər yaranıb. Buna səbəb onun vəzifədə olduğu dövrdə ABŞ-ın Suriyada yerləşdirilən qoşunların sayını gizlətməsi ilə bağlı irəli sürülən iddialar olub.

Respublikaçı senator Rand Paul və komitənin Demokrat üzvləri Reybernin  Suriyadakı fəaliyyəti ilə bağlı narahatlıqlarını bildirdikdən sonra, komitə onun namizədliyini müsbət tövsiyə vermədən Senata təqdim etdi.

Coel Reybern may ayında keçirilən dinləmələrdə bildirib ki, ABŞ rəsmilərinə Suriyadakı qoşun sayı barədə yanlış məlumat verilməsində onun heç bir rolu olmayıb.

2018-ci ilin dekabrında Donald Tramp Suriyadakı bütün ABŞ əsgərlərinin ölkədən çıxarılacağını elan edib və DEAŞ-ın məğlub olduğunu bəyan edib. Lakin Konqresin, Pentaqonun və ABŞ milli təhlükəsizlik orqanlarının güclü müqavimətindən sonra o, bu qərarından vaz keçib.

Pentaqon bu ilin aprel ayında ABŞ qüvvələrinin “Qətiyyət” əməliyyatı çərçivəsində birləşdiriləcəyini və yaxın aylarda Suriyadakı əsgər sayının 1000-dən aşağı düşəcəyini açıqlayıb.

Tramp may ayında Suriya Prezidenti Əhməd Şəraa ilə görüşdükdən sonra Suriyaya qarşı tətbiq olunan sanksiyaların əksəriyyətinin ləğv edilməsinə göstəriş verib.