Türkiyənin BMT-dəki daimi nümayəndəsinin müavini Gülşah Cumurcu Kader bildirib ki, beynəlxalq ictimaiyyət Qəzzada baş verən ağır vəhşiliklərin şahidi olur.
“İkinci Dünya Müharibəsi və Holokostdan sonra verilən ‘‘bir daha əsla’’ vədi kollektiv vicdanda kök salsa da, beynəlxalq ictimaiyyət soyqırıma bərabər ola biləcək böyük vəhşilikləri görməyə davam edir”, – deyə Gülşah Cumurcu Kader vurğulayıb.
O, bu fikirləri Beynəlxalq Soyqırımı Cinayəti Qurbanlarının Xatirəsini Anma Gününün 10-cu ildönümü münasibətilə keçirilən iclasda səsləndirib.
Qəzzanın “ağrılı bir xatırlatma və xəbərdarlıq” olduğunu bildirən Kader qeyd edib ki, keçmişin faciəli dərsləri bu gün göstərilən səylərə istiqamət verməlidir.
Beynəlxalq hüququn əsas prinsip kimi qalmasının vacibliyini vurğulayan Türkiyə nümayəndəsi “soyqırım” terminindən daxili siyasi məqsədlər üçün, həm də beynəlxalq hüquqa və səlahiyyətli məhkəmələrin qərarlarına zidd şəkildə istifadə olunmamalı olduğunu bildirib.
Kader üzv dövlətləri bu termindən siyasi alət kimi istifadə etməkdən çəkinməyə çağırıb və dünyada artan “irqçilik, ksenofobiya, islamofobiya, ayrı-seçkilik və başqalarına qarşı dözümsüzlük” meyilləri barədə xəbərdarlıq edib.
O, həmçinin “erkən xəbərdarlıq siqnallarının” əhəmiyyətinə toxunaraq BMT sistemində daha güclü koordinasiyanın “bir daha əsla” vədinin gerçəkləşməsi üçün vacib olduğunu vurğulayıb.
