Türkiyə xarici işlər naziri Hakan Fidan qlobal nizamın “dərinləşən iflic” vəziyyəti yaşadığını, bunun beynəlxalq qurumlara olan etimadı sarsıtdığını və dövlətləri birtərəfli addımlar atmağa vadar etdiyini bildirib. Nazir bu vəziyyəti “legitimlik böhranı” kimi xarakterizə edib.
Noyabrın 1-də (bu gün) İstanbulda keçirilən “TRT World” Forumunda çıxış edən H.Fidan tərəfdaşlıq və inklüzivlik prinsiplərinə əsaslanan güclü və islahat olunmuş beynəlxalq sistem qurulmasına çağırış edib. Nazir H.Fidan deyib: “Dünya təkqütblü sistemdən uzaqlaşır. Belə olduğu halda yeni nizamı çoxtərəflilik prinsipi üzərindəmi qurulacaq, yoxsa dağıdıcı rəqabət dövrünəmi qayıdılacaq? Bu gün üzləşdiyimiz əsas problem qaydaların olmaması deyil, onların bərabər şəkildə tətbiq edilməməsidir.”
H.Fidan xüsusilə Birləşmiş Millətlər Təşkilatının (BMT) köklü şəkildə islahat edilməsinin zəruriliyini vurğulayaraq bildirib ki, bu qurum getdikcə öz qurulma prinsipinin vədlərini yerinə yetirməkdə çətinlik çəkir.
XİN rəhbəri əlavə edib ki, Türkiyə bir neçə ölkəni imtiyazlı vəziyyətə salmaq əvəzinə, çoxluğu gücləndirən daha demokratik və təmsilçi bir BMT Təhlükəsizlik Şurasının yaradılmasının tərəfdarıdır.
Qəzzadaki atəşkəs
Orta Şərq mövzusuna da toxunan H.Fidan çıxışı sırasında deyib: “Legitimliyin itirilməsi və qlobal idarəetmədəki iflic vəziyyətinin ən faciəvi təzahürü məhz Qəzzada müşahidə olunur.”
Nazir qeyd edib ki, Türkiyə prezidenti Rəcəb Tayyib Ərdoğanın baxışları istiqamətində rəsmi Ankara soyqırımın dayandırılması və ədalətin bərqərar olması üçün diplomatik səylərə rəhbərlik edir. Buna Qəzza məsələsində İslam Əməkdaşlıq Təşkilatı–Ərəb Liqası Birgə Əlaqə Qrupunun yaradılması da daxildir.
H.Fidan Nyu-York və Şarm əl-Şeyxdə keçirilən son görüşləri “sülh istiqamətində atılmış mühüm addımlar” kimi qiymətləndirib, lakin İsrailin davam edən hücumları səbəbindən atəşkəsin hələ də həssas olduğunu vurğulayıb.
Sonda isə XİN rəhbəri bildirib ki, ədalətli və daimi sülh yalnız iki dövlətli həllin həyata keçirilməsi və Qəzzanın fələstinlilər tərəfindən idarə olunması ilə mümkündür.
