İspaniyanın cənubunda yerləşən Andalusiya bölgəsində güclü meşə yanğınları nəticəsində azı 12 nəfər həyatını itirib.

"RTVE" telekanalının məlumatına görə, təbii fəlakət Almeriya əyalətinin Los Qayardos bölgəsində baş verib. Andalusiya təcili yardım xidmətindən bildirilib ki, qurbanların cəsədləri Bedar bölgəsindəki kiçik bir yaşayış məntəqəsində, bəziləri isə yanan nəqliyyat vasitələrinin daxilində tapılıb.

Yanğının sürətlə yayılması səbəbindən bölgədə fövqəladə vəziyyət elan olunub və İspaniya Hərbi Fövqəladə Hallar Bölməsi (UME) yanğınsöndürmə işlərinə dəstək üçün əraziyə 150 nəfərlik heyət göndərib. Güclü yanğın əyalətdəki iki əsas magistral yolun bağlanmasına səbəb olub.

Ölkənin cənubundakı Malaqa əyalətində başlayan ikinci meşə yanğını səbəbindən təxminən 1000 sakin təxliyə edilib. Hazırda yanğının nəzarət altına alınması üçün 180-dən çox yanğınsöndürən bölgədə fəaliyyət göstərir.