Rusiya NATO və ya Aİ üzvlərinə qarşı heç bir "aqressiv planı" olmadığını və bu məqsədlə yazılı zəmanətlər verməyə hazır olduğunu bir daha ifadə edib.
Moskvada səfirlər və beynəlxalq təşkilatların nümayəndələri ilə keçirilən dəyirmi masa görüşündə çıxış edən xarici işlər naziri Sergey Lavrov deyib: "Prezident Putinin açıq şəkildə bildirdiyi kimi, Moskvanın nə NATO, nə də Aİ üzvlərinə qarşı heç bir aqressiv planı yoxdur. Biz bu zəmanətləri yazılı, hüquqi sənəddə rəsmiləşdirməyə hazırıq. Əlbəttə ki, kollektiv və qarşılıqlı əsasda".
Lavrov bildirib ki, Rusiya prezidenti Vladimir Putin və ABŞ prezidenti Donald Trampın xüsusi nümayəndəsi Stiv Uitkov arasında Moskvada keçirilən son danışıqlar avqust ayında Alyaska sammitindən sonra iki ölkə arasında yaranan "anlaşılmazlıqlar və kommunikasiya pozuntularını" həll edib.
Lavrov həmçinin Rusiya tərəfinin Vaşinqtonla sammitdə əldə edilən razılaşmaları davam etdirdiyini və kollektiv təhlükəsizlik zəmanətləri ilə bağlı "əlavə təkliflər" təqdim etdiklərini bildirib və əlavə edib: "Təhlükəsizlik zəmanətləri ilə bağlı danışıqların yalnız Ukrayna ilə məhdudlaşmayacağını başa düşürük".
Lavrov bildirib ki, Rusiya kollektiv kontekstdə formalaşdırılmış və hüquqi cəhətdən məcburi müqavilələrin bağlanmasına gətirib çıxaracaq bütün mövcud təklifləri nəzərdən keçirməyə hazırdır və bir böhranın dərhal digərinin ardınca gəlməsini istəmirik".
O, həmçinin Qərb ölkələrini davam edən Rusiya-Ukrayna münaqişəsindən "diqqəti qlobal ictimaiyyətin üzləşdiyi digər vacib məsələlərdən, o cümlədən Fələstindən yayındırmaq" üçün "istifadə etməkdə" günahlandırıb.
