İsrailin dövlət kanalı “KAN”ın iyunun 2-dә (bu gün) yaydığı məlumata əsasən, B.Netanyahu ABŞ-yə səfərini əsas gətirərək məhkəmə proseslərinin dayandırılmasını istəyib və prokurorluq onun bu tələbini təsdiqləyib. Eyni zamanda, bu həftəyə nəzərdə tutulmuş məhkəmə iclasları da Baş nazirin oxşar müraciəti əsasında Qüds Regional Məhkəməsi tərəfindən ləğv olunub.

Qeyd edək ki, ABŞ prezidenti Donald Tramp daha әvvәl dəfələrlə B.Netanyahunun məhkəmə işinin ləğv edilməsinə çağırış edərək bu hüquqi prosesi Baş nazirə qarşı aparılan “ov kampaniyası” adlandırıb. İclasların təxirə salınması qərarı da D.Trampın bu çağırışlarından sonra verilib.

Xatırladaq ki, B.Netanyahu rüşvət, dələduzluq və ictimai etimadı sui-istifadə etmək ittihamları ilə mühakimə olunur. Əgər təqsirli bilinərsə, onu həbs cəzası gözləyir. O, qeyd olunan işlər üzrə yanvar ayında ifadə verməyə başlayıb, lakin bu ittihamları qəbul etmədiyini bildirib. Baş prokuror adıçəkilən işlərlə bağlı ittiham aktını 2019-cu ilin noyabrında məhkəməyə təqdim edib.

B. Netanyahunun məhkəmə prosesi 24 may 2020-ci ildə başlayıb. Beləliklə, o, İsrail tarixində vəzifədə olarkən cinayət işi üzrə ifadə verən ilk Baş nazir olub.

Bundan başqa, B.Netanyahu həm də müharibə cinayətləri və bәşәriyyәtә qarşı cinayətlərdə ittiham olunur. Beynəlxalq Cinayət Məhkəməsi 2024-cü ilin noyabr ayında Qəzzada törədilmiş insanlığa zidd hərəkətlərə görə B.Netanyahu və sabiq müdafiə naziri Yoav Qalant barəsində həbs qərarı çıxarıb.