Türkiyənin xarici işlər naziri Hakan Fidan bildirib ki, rəsmi Ankara Qəzzada atəşkəs razılaşmasının ikinci mərhələsinin başlaması üçün səylərini davam etdirir. O, davam edən pozuntuların zorakılığın yenidən alovlanmasına və regionda sabitliyin pozulmasına səbəb ola biləcəyi barədə xəbərdarlıq edib.
“TRT World”a müsahibə verən Hakan Fidan, 2023-cü ilin sonlarından etibarən Qəzzada baş verən hadisələr fonunda atəşkəsin son dərəcə vacib olduğunu vurğulayıb.
“Atəşkəs davamlı şəkildə pozulur”, – deyən Hakan Fidan razılaşmanın qüvvəyə mindiyi vaxtdan bəri təxminən 400 fələstinlinin öldürüldüyünü bildirib.
Xarici işlər naziri Türkiyənin beynəlxalq sabitləşdirmə qüvvəsinin yaradılmasını və Qəzza üçün idarəetmə mexanizmini nəzərdə tutan razılaşmanın ikinci mərhələsinə keçidi dəstəklədiyini qeyd edib. O, danışıqların davam etdiyini və ilkin nəticələrin yaxın bir neçə həftə ərzində gözlənildiyini də söyləyib.
Hakan Fidan İsrailin etirazlarına baxmayaraq Türkiyənin istənilən beynəlxalq qüvvəyə töhfə verməyə hazır olduğunu bildirib və Ankaranın Qəzzada baş verənlərə qarşı “insan vicdanının səsi” kimi hərəkət etdiyini deyib.
Suriya məsələsinə də toxunan Hakan Fidan DEAŞ-ın hələ də ciddi təhlükə olaraq qaldığını, lakin regional əməkdaşlıq yolu ilə nəzarət altına alına biləcəyini vurğulayıb. O, PKK/YPG-nin nəzarətində olan SDF terror təşkilatının Suriyanın yeni təhlükəsizlik çərçivəsinə inteqrasiyasında gecikmələrin milli birliyi zəiflətdiyini və bu prosesdə əsas tərəflərin səbrinin tükəndiyini bildirib.
Ukraynadakı müharibə ilə bağlı danışan Hakan Fidan Türkiyənin ABŞ-ın rəhbərlik etdiyi vasitəçilik səylərini dəstəklədiyini bildirib. O, tərəflərin razılaşmaya yaxın olduğunu düşündüyünü, lakin əldə olunacaq istənilən razılaşmanın Ukrayna ictimaiyyəti tərəfindən qəbul olunmasının vacib olduğunu vurğulayıb.
Nazir həmçinin Qara dənizdə artan hücumların daha geniş regional qeyri-sabitliyə səbəb ola biləcəyi barədə xəbərdarlıq edib və Türkiyənin dəniz təhlükəsizliyi ilə bağlı narahatlıqlarını bir daha ifadə edib.
