Küveytdə səfərdə olan Türkiyə prezidenti Rəcəb Tayyib Ərdoğanın Küveyt Dövlətinin Əmiri Şeyx Məşəl əl-Əhməd əl-Cabir əs-Sabah ilə görüşündə ikitərəfli əlaqələr, regional və qlobal məsələlər müzakirə olunub.
Prezident Rəcəb Tayyib Ərdoğan Qəzzada İsrail ilə Fələstinin müqavimət təşkilatı HƏMAS arasında çətin şəraitdə əldə edilən atəşkəsin qorunmasının kritik əhəmiyyət daşıdığını bildirib.
Ərdoğan Küveytə rəsmi səfəri çərçivəsində bu ölkənin Əmiri Şeyx Məşəl əl-Əhməd əl-Cabir əs-Sabah ilə görüşüb. İctimaiyyətlə Əlaqələr İdarəsindən verilən məlumata görə, liderlər ikitərəfli əlaqələri, regional və qlobal məsələləri müzakirə ediblər.
Türkiyə Prezidenti Administrasiyasının İctimaiyyətlə Əlaqələr İdarəsinin açıqlamasında: “Prezident Ərdoğan Qəzzada çətinliklə əldə edilən atəşkəsin qorunmasının kritik əhəmiyyətini, davamlı sülh üçün iki dövlətli həllin vacib olduğunu və İslam dünyasının həmişə olduğu kimi bu mövzuda vahid mövqe nümayiş etdirməsinin çox vacib olduğunu vurğuladı” deyilib.
Açıqlamada Ərdoğanın "Türkiyə Suriyanın siyasi birliyini və ərazi bütövlüyünü qorumaqda qərarlıdır və Suriya xalqı üçün parlaq bir gələcək qurmaq üçün qardaş ərəb dövlətləri ilə birlikdə çalışmaq istəyir" ifadəsi də vurğulanıb.
İkitərəfli əlaqələrə gəlincə, Ərdoğan Türkiyə ilə Küveyt arasında investisiya, enerji, ticarət və müdafiə sənayesi sahələrində mövcud əməkdaşlığın strateji əhəmiyyət daşıdığını bildirib.
Açıqlamada həmçinin “Prezident Ərdoğan dərin köklü əlaqələrimizin daha da inkişaf etdirilməsi üçün potensialın olduğunu bildirdi” deyilib:
Dövlət başçısı onu da deyib ki, Körfəz Əməkdaşlıq Şurasının hazırkı sədri Küveytin regional sabitliyin təşviqi istiqamətində göstərdiyi səyləri məmnunluqla qarşılayırıq. Hazırda Türkiyə ilə Körfəz ölkələri arasında müzakirələr aparılan Azad Ticarət Sazişi qardaş Körfəz ölkələri ilə ticarət əlaqələrimizin inkişafına töhfə verəcək.
Türkiyə ilə Küveyt arasında dörd müqavilə imzalanıb
Ərdoğan və Şeyx Məşəlin iştirakı ilə Türkiyə ilə Küveyt arasında 4 müqavilə imzalanıb.
Küveytin Bayan sarayında keçirilən ikitərəfli və nümayəndə heyətləri arası görüşlərdən sonra iki ölkə arasında müxtəlif müqavilələrin imzalanması mərasimi keçirilib.
Türkiyənin Nəqliyyat və İnfrastruktur Nazirliyi ilə Küveytin Daxili İşlər Nazirliyi arasında dəniz daşımalarına dair saziş və dənizçi sertifikatlarının qarşılıqlı tanınmasına dair anlaşma memorandumu xarici işlər naziri Hakan Fidan və Küveytin daxili işlər naziri Şeyx Fəhad Yusuf Səud Əl Sabah tərəfindən imzalanıb.
Türkiyə ilə Küveyt arasında enerji sektorunda əməkdaşlığa dair anlaşma memorandumu enerji və təbii ehtiyatlar naziri Alparslan Bayraktar və Küveytin elektrik, su və bərpa olunan enerji naziri Subaih Əbdüləziz Əbdülmohsen Əl-Muhaizəm tərəfindən imzalanıb.
Bundan başqa, Prezident yanında İnvestisiya İdarəsi tərəfindən təmsil olunan Türkiyə ilə Küveyt Birbaşa İnvestisiyaların Təşviqi Agentliyi (KDIPA) tərəfindən təmsil olunan Küveyt arasında birbaşa investisiyaların təşviqi sahəsində əməkdaşlığa dair anlaşma memorandumu Türkiyə İnvestisiya İdarəsinin rəhbəri Əhməd Burak Dağlıoğlu və KDIPA-nın baş direktoru Şeyx Meşal tərəfindən imzalanıb.
Oktyabrın 21-də Küveytdə rəsmi mərasimlə qarşılanan Ərdoğan Məşəl ilə də heyətlərarası görüşlər keçirib.
Ərdoğan həmçinin Məşələ Türkiyənin yerli istehsalı olan "Togg" elektromobilinin maketini də hədiyyə edib.
