Rusiya və Ukrayna bir-birinə qarşı hava hücumlarını davam etdirərək yaralanmalara və zərərlərə səbəb olub, rəsmilər bildirib. Üç ildir davam edən müharibəyə təklif olunan atəşkəsin taleyi isə hələ də qeyri-müəyyən olaraq qalır.

Rusiya prezidenti Vladimir Putin martın 13-də rəsmi Vaşinqtonun Ukrayna ilə 30 günlük atəşkəs təklifini dəstəklədiyini, lakin ordusunun müəyyən kritik şərtlər yerinə yetirilənə qədər döyüşləri davam etdirəcəyini bildirib.

Bu bəyanatdan sonra tərəflər ağır hava hücumları həyata keçirib. Rusiya Ukrayna qüvvələrini Qərbi Kursk bölgəsindəki aylarla saxladıqları mövqelərindən çıxarmağa daha da yaxınlaşıb.

Rusiya Müdafiə Nazirliyi 16 martda bildirib ki, havadan müdafiə sistemləri ölkə ərazisində ümumilikdə 31 Ukrayna dronunu məhv edib. Bunlardan 16-sı Voronej, 9-u Belqorod, qalanları isə Rostov və Kursk bölgələrində vurulub.

Pilotsuz təyyarənin Belqoroda hücumu nəticəsində 3 nəfər yaralanıb. Vilayət qubernatoru Vyaçeslav Qladkov bildirib ki, yaralananlardan biri 7 yaşlı uşaqdır. Qladkovun sözlərinə görə, Qubkinski rayonunda bir evə dəyən pilotsuz təyyarə yanğın törədib və iki nəfər yaralanıb, Dolqoye kəndində isə bir adam yaralanıb.

Voronej qubernatoru Aleksandr Qusev bildirib ki, bölgədə xəsarət barədə məlumat daxil olmayıb. Rostovun müvəqqəti qubernatoru da bölgədə xəsarət alanların və ya dağıntıların olmadığını açıqlayıb.

Ukraynada isə hakimiyyət orqanları bir neçə Rusiya dron hücumu barədə məlumat verib. Bu hücumlar nəticəsində Çerniqov bölgəsində yüksək mərtəbəli binada yanğın olub. Yanğın Rusiya dron hücumu nəticəsində yaranıb və yanğınsöndürənlər hadisəyə müdaxilə edib.

Ukrayna mediası paytaxt Kiyev ətrafında silsilə partlayışların baş verdiyini yazıb. Ukrayna Hərbi Hava Qüvvələri Kiyev və bəzi digər mərkəzi rayonlar üzərində pilotsuz təyyarələrin hücum təhlükəsi barədə xəbərdarlıq edib.

16 mart saat 03:00-a olan məlumatına görə, Kiyev vilayətində hər hansı dağıntı olub-olmaması ilə bağlı rəsmi açıqlama verilməyib.