İran prezidenti Məsud Pezeşkiyan ABŞ-ı İran İslam Respublikasının öz ayaqları üzərində durmasının qarşısını almağa çalışmaqda ittiham edib. O, ölkəsinin heç vaxt nüvə silahı ardınca getmədiyini və kütləvi qırğın silahlarına yer olmadığını bəyan edib.
Pezeşkiyan bu açıqlamaları sentyabrın 28-də “Fox News” kanalına verdiyi müsahibədə səsləndirib. Beynəlxalq ictimaiyyətin təzyiqlərinə və yenilənmiş sanksiyalara baxmayaraq, İranın nüvə silahı hazırlamaq niyyətində olmadığını bildirib.
“Biz heç zaman dinc məqsədli nüvə proqramından başqa bir şey axtarmamışıq. Nüvə silahları və ya digər kütləvi qırğın silahları üçün ölkəmizdə yer yoxdur. Biz heç vaxt nüvə silahı əldə etməyə çalışmamışıq və bu yolda da getməyəcəyik,” – deyə o bildirib.
İsrailin son hücumları və İsrail kəşfiyyatının İrana sızması ilə bağlı sualı cavablandıran Pezeşkiyan Tel-Əvivin beynəlxalq hüququ və razılaşmaları pozduğunu qeyd edərək, İsraili aqressiv davranmaqda günahlandırıb: “Bu, İsrailin nə qədər aqressiv olduğunu göstərir”.
"Snapback"
Sentyabrın 28-i səhər saatlarında Fransa, Almaniya və Böyük Britaniya, BMT Təhlükəsizlik Şurasının 2231 saylı qətnaməsi çərçivəsində “snapback” mexanizmini işə saldı. Bu mexanizmə əsasən, İran öhdəliklərini yerinə yetirmədikdə, 30 gün ərzində sanksiyalar avtomatik olaraq bərpa olunur.
Xatırladaq ki, bu ilin əvvəlində ABŞ və İsrailin İrana qarşı həyata keçirdiyi hücumlardan sonra Tehran Beynəlxalq Atom Enerjisi Agentliyi (BAEA) ilə əməkdaşlığı dayandırmış, qurumu qərəzli mövqe tutmaqda ittiham etmişdi.
ABŞ-ın həyata keçirdiyi hərbi hücumları İranın nüvə obyektlərini hədəf alıb. Tramp administrasiyasının keçmiş rəsmiləri bu hücumların zənginləşdirmə obyektlərini "tamamilə məhv etdiyini" iddia etsə də, İran bu ziyanların miqyasını şübhə altına alır.
Üç Avropa ölkəsinin Tehranın nüvə öhdəliklərini pozduğunu iddia etməsinin ardından, on il sonra ilk dəfə sanksiyalar yenidən tətbiq olunmağa başlanıb. Bu tədbirlərin İranın nüvə və ballistik raket proqramları ilə bağlı əməliyyatlarını qadağan etməklə yanaşı, ölkə iqtisadiyyatına daha geniş təsir edəcəyi gözlənilir.
