Qazıntı və bərpa işləri başa çatdıqdan sonra Türkiyənin şimalında yerləşən təxminən 2 min 100 illik bir məzar qalıqları (kurqan) ziyarətçilər üçün açılıb. Bu barədə yerli qurumlar məlumat yayıb.

Kastamonu vilayətinin Daday rayonuna bağlı Kayı kəndində yerləşən bu təpə antik Paflaqoniya bölgəsinin ən mühüm məzar abidələrindən biri hesab olunur.

Ərazi 1998-ci ildə birinci dərəcəli arxeoloji sahə kimi qeydiyyata alınıb. Buna baxmayaraq, illər ərzində icazəsiz qazıntılara məruz qalıb.

2015–2017-ci illər arasında Mədəniyyət və Turizm Nazirliyi tərəfindən həyata keçirilən qazıntı və bərpa işləri çərçivəsində məzar yerini əhatə edən iri daş bloklar yenidən öz yerinə yerləşdirilib, abidə ziyarətçilər üçün uyğun vəziyyətə gətirilib.

Yerli rəsmilər və kənd sakinləri ərazinin mədəni irs baxımından böyük əhəmiyyət daşıdığını vurğulayaraq, daha geniş beynəlxalq tanıtım aparılacağı təqdirdə buradakı turizm potensialının artacağını bildirirlər.

Kayı kəndinin icra nümayəndəsi İbrahim Terzi bildirib ki, sözügedən sahə bölgənin mədəni irsi baxımından olduqca dəyərlidir.

İbrahim Terzi deyir: “Dünyanın bu ərazidən xəbərdar olmasını və buranın Paflaqoniya məzarlığı kimi turizmə açılmasını istəyirik.”

Təbiət fotoqrafı Cəbrail Keleş də kurqanın tarixi əhəmiyyətinə diqqət çəkərək, burada inkişaf etmiş qədim bir sivilizasiyanın izlərinin aydın şəkildə müşahidə olunduğunu deyib: “Aşkar edilən qalıntılara nəzər yetirildikdə, iki min ildən artıq müddət əvvəl burada inkişaf etmiş bir sivilizasiyanın mövcud olduğunu görmək mümkündür.”