Türkiyə Prezidenti Rəcəb Tayyib Ərdoğan XIX əsrin ən qaranlıq səhifələrindən biri hesab edilən çərkəzlərin Qafqazdan sürgün edilməsini yad etmək məqsədilə paylaşım edib.
Rəcəb Tayyib Ərdoğan mayın 21-də rəsmi “X” platformasında etdiyi paylaşımda bu ifadələrə yer verib:“Qafqazdakı vətənlərindən haqsız və qanunsuz şəkildə sürgün edilən çərkəz qardaşlarımızın yaşadığı ifadəolunmaz ağrını bölüşür, həyatını itirənlərə Allahdan rəhmət diləyirəm’’.
Qeyd edək ki, bu il 21 may tarixi çərkəz sürgününün 161-ci ildönümüdür. Bu faciəli hadisə Rusiya–Çərkəz müharibəsinin sona çatmasının ardından baş verib.
Təxminən 800 minlə 1,5 milyon arasında çərkəz Rusiya imperiyasının əmri ilə Şimali Qafqazdakı ata-baba torpaqlarından zorla çıxarılıb və əsasən Osmanlı imperiyası olmaqla müxtəlif bölgələrə sürgün edilib. Qeyri-insani şəraitdə həyata keçirilən uzun yürüşlər, aclıq və xəstəliklər bu sürgün zamanı kütləvi ölümlərə səbəb olub. Baş verənlər XIX əsrin ən böyük etnik təmizləmə hadisələrindən biri hesab olunur.
Bu gün bir çox çərkəz mənşəli insan Türkiyə, Suriya, İordaniya və Yaxın Şərqin digər bölgələrində yaşayır. Bu faciə hər il 21 may tarixində dünyanın müxtəlif ölkələrindəki bütün çərkəz icmaları tərəfindən yad edilir.
