Ukraynanın bir gecədə Rusiyaya 100-dən çox PUA zərbəsi endirməsindən sonra ölkənin hava limanlarında hava nəqliyyatının hərəkətində fasilələr yaranıb. Müdafiə Nazirliyinin məlumatına görə, ümumilikdə 105 PUA Rusiyanı hədəf alıb.
Moskva meri Sergey Sobyanin rəsmi "Telegram" kanalında bildirib ki, hava hücumundan müdafiə sistemləri Moskva ətrafında 19 pilotsuz uçuş aparatını vurub. Dağıntılar şəhərin cənubundakı əsas küçəyə düşüb, lakin xəsarət alan olmayıb.
Rusiya xəbər agentliklərinin Federal Hava Nəqliyyatı Agentliyinə istinadən verdiyi məlumata görə, hücum səbəbindən Moskvanın dörd hava limanında uçuşlar dayandırılıb. Şəhərin əsas hava limanı olan Şeremetyevo isə hücumlardan təsirlənməyib.
Rusiya media orqanlarının məlumatına görə, Volqoqrad və Nijni Novqorod da daxil olmaqla digər şəhərlərin hava limanları da hadisədən təsirlənib. Voronej və Penza qubernatorları isə öz bölgələrində Ukrayna PUA-larının qarşısının alındığını və itkilərin olmadığını bildirib.
Kursk vilayətinin müvəqqəti qubernatoru Aleksandr Xinşteyn Rilsk şəhərində transformatorlara hücum edildiyini və iki gəncin yaralandığını açıqlayıb.
Odessa vilayətinin qubernatoru Oleq Kiper isə Rusiyaya məxsus pilotsuz uçuş aparatının bölgəyə endirdiyi zərbənin bir nəfərin ölümünə səbəb olduğunu açıqlayıb.
