Türkiyə dövləti və Birləşmiş Krallıq iki müttəfiq arasında müdafiə əlaqələrinin gücləndirilməsi istiqamətində növbəti addım kimi “Eurofighter Typhoon” döyüş təyyarələrinin texniki xidmət və istismarını dəstəkləyən yeni saziş imzalayıb.

Tərəflər arasındaki saziş martın 25-də (bu gün) Londonda Türkiyə Respublikasının milli müdafiə naziri Yaşar Gülər ilə Birləşmiş Krallığın müdafiə naziri Con Hili arasında keçirilən görüş zamanı yekunlaşdırılıb.

Türkiyə Respublikasının Milli Müdafiə Nazirliyinin məlumatına görə, saziş “Eurofighter Typhoon” proqramı çərçivəsində olan təyyarələr üçün texniki və logistika dəstəyinə yönəlib və onların uzunmüddətli əməliyyat hazırlığının təmin edilməsini hədəfləyir.

Sözügedən saziş genişmiqyaslı alış müqaviləsinin davamıdır

Xatırladaq ki, bu saziş ötən il imzalanmış daha geniş müqavilədən sonra bağlanıb. Həmin müqavilə Türkiyənin 20 ədəd “Typhoon” döyüş təyyarəsi, eləcə də müvafiq avadanlıq və sursat almasını nəzərdə tutur və dəyəri 8 milyard funt sterlinq (10,7 milyard ABŞ dolları) təşkil edir.

Rəsmilər bildiriblər ki, proqramla bağlı ayrıca tədarük müqaviləsi artıq oktyabr ayında tamamlanıb və bu da hazırkı texniki xidmət yönümlü sazişin imzalanmasının əsasını təşkil edib.

Strateji tərəfdaşlıq möhkəmlənir

Nazirlər Yaşar Gülər və Con Hili görüş zamanı müdafiə sahəsində əməkdaşlığın genişləndirilməsini də müzakirə ediblər. Hər iki tərəf qarşıdakı illərdə hərbi əməkdaşlığın daha da dərinləşdirilməsi ilə bağlı qətiyyət nümayiş etdirib.

Qeyd edək ki,  “Eurofighter” konsorsiumunun əsas tərəfdaşlarından biri olan Birləşmiş Krallıq, Almaniyanın 2024-cü ildə satışla bağlı veto qərarını ləğv etməsindən sonra aylarla davam edən danışıqlar nəticəsində əldə olunan bu sazişin imzalanmasında Türkiyənin ən güclü dəstəkçilərindən biri olub.