Ukrayna Hərbi Hava Qüvvələri Rusiyaya məxsus 38 pilotsuz uçuş aparatının vurulduğunu, onlardan 16-nın hədəflərinə çata bilmədiyini, bunun ehtimal ki, elektron müharibə tədbirləri ilə bağlı olduğunu bildirib.

Rusiya qüvvələri gecə saatlarında Ukraynanın Qara dəniz sahilindəki Odessa şəhərinə pilotsuz uçuş aparatları ilə güclü zərbə endirib. Yerli səlahiyyətlilər hücum nəticəsində 3 nəfərin yaralandığını və bir neçə yaşayış binasının zərər gördüyünü bildirib.

Odessa meri Hennadiy Truxanov aprelin 22-də səhər tezdən "Telegram" mesajlaşma proqramında yazıb: "Düşmən Odessanın sıx məskunlaşdığı ərazidəki yaşayış məntəqəsini hədəfə alıb". Paylaşımda həmçinin pəncərələri sınmış və fasadları zədələnmiş yanğına məruz qalmış yaşayış binalarının fotolarını əlavə edilib.

Bölgə qubernatoru Oleh Kiper hücumda 3 nəfərin yaralandığını və onlara tibbi yardım göstərildiyini qeyd edib.

Ukrayna Hərbi Hava Qüvvələri bildirib ki, Rusiya gecə saatlarında pilotsuz uçuş aparatları ilə 54 zərbə endirib, onlardan 38-i vurulub, 16-sı isə elektron müharibə tədbirləri səbəbindən hədəflərinə çata bilməyib.

Kiper vurğulayıb ki, Odessaya hücum nəticəsində yaşayış evlərinə, mülki infrastruktura, təhsil müəssisəsinə və nəqliyyat vasitələrinə ziyan dəyib.

Təcili yardım briqadalarının paylaşdığı videolarda dağılmış binalardan birində böyük yanğının söndürüldüyü əks olunub.

Üç limanı olan Odessa Rusiya ilə 3 ildən artıqdır davam edən müharibədə tez-tez Rusiya hücumlarının hədəfindədir.