Türkiyə süni intellekt sahəsində dünyanın aparıcı ölkələrindən birinə çevrilməyi hədəfləyir.
Bu barədə Türkiyənin sənaye və texnologiya naziri Mehmet Fatih Kacır İstanbulda keçirilən "GITEX AI Türkiye" tədbirində bildirib. Nazir vurğulayıb ki, Türkiyə hazırlanan fəaliyyət planı və irihəcmli investisiyalar sayəsində bu sahədə aparıcı dövlətlər sırasına daxil olmaq niyyətindədir.
Hökumətin rəqəmsal sahəyə dəstək verdiyini vurğulayan M. F. Kacır hazırda ölkə üzrə 1700 tədqiqat mərkəzinin və 115 texnoparkın fəaliyyət göstərdiyini diqqətə çatdırıb.
Dövlət fondları vasitəsilə yeni texnologiya şirkətlərinə (startaplara) indiyədək 2,8 milyard dollar ayrıldığını deyən nazir bu yaxınlarda elan edilən 300 milyon dollarlıq yeni kapitalın sektora daha 750 milyon dollar investisiya gətirəcəyini qeyd edib. Ölkədə dəyəri 1 milyard dolları ötən 8 iri texnologiya şirkətinin ("Turcorn") olduğunu bildirən Kacır hədəflərinin texnoloji startapların sayını 100 minə çatdırmaq olduğunu vurğulayıb.
Qeyd edək ki, İstanbulu beynəlxalq texnologiya mərkəzinə çevirmək məqsədilə keçmiş Atatürk Hava Limanının terminalı dünyanın ən böyük startap mərkəzi kimi fəaliyyət göstərəcək.
Türkiyə süni intellekt yönümlü innovasiya fondlarına 150 milyon dollar vəsait ayırmağı planlaşdırır. Həmçinin rəqəmsal transformasiyanı sürətləndirmək üçün süni intellekt layihələrinə 1,6 milyard dollarlıq dəstək paketi təqdim edilib. 2026–2030-cu illəri əhatə edən Fəaliyyət Planına əsasən, dövlət investisiyalarının ən azı 2%-i süni intellekt layihələrinə yönəldiləcək, 2030-cu ilə qədər isə rəqəmsal infrastruktura və bulud texnologiyalarına ən azı 10 milyard dollar investisiya yatırılacaq.
Nazir Türkiyənin ilk milli dil modeli olan "BİLGE"nin tezliklə proqramçılara təqdim ediləcəyini və hazırda ölkə yollarında 120 minə yaxın yerli elektrikli "TOGG" avtomobilinin istismar olunduğunu da qeyd edib.
