Türkiyə Prezidenti Rəcəb Tayyib Ərdoğan İsrailin Baş naziri Benyamin Netanyahunun yürütdüyü siyasəti sərt tənqid edərək, bu "terrorun" həm regional, həm də qlobal sülh üçün ciddi təhdid yaratdığını vurğulayıb. Prezident xüsusilə İrana qarşı son hücumların bölgədəki qeyri-sabitliyi daha da dərinləşdirdiyini qeyd edib.
Türkiyənin sülh, sabitlik və dialoqun bərpası naminə bütün imkanlarını səfərbər etdiyini bildirən Ərdoğan bayram günlərində çətinlik çəkən bütün məzlum xalqlarla, xüsusilə Qəzza sakinləri ilə həmrəy olduğunu ifadə edib.
Prezident bu çətin günlərin və bölgədəki sınaq dövrünün qarşılıqlı dəstək, ümid və səbir sayəsində tezliklə geridə qalacağına inandığını bildirib.
R.T.Ərdoğan həmçinin İslam dünyasının hazırda müxtəlif maneələr, hiyləgər planlar və tələlərlə dolu çətin bir yoldan keçdiyini qeyd edib.
Bölgədəki digər münaqişə ocaqlarına da toxunan dövlət başçısı Türkiyənin diplomatik səyləri nəticəsində Ramazan bayramı ərəfəsində Pakistan və Əfqanıstan arasında əldə olunmuş atəşkəsi müsbət addım kimi qiymətləndirib və bu sülhün daimi olacağına ümidvar olduğunu bildirib.
