Dekabrın 7-də (bu gün) yayılan rəsmi məlumatlara görə, Asiyanın müxtəlif bölgələrində baş verən daşqın və torpaq sürüşmələrində ölənlərin sayı 1.700-ü ötüb, yüzlərlə insan isə hələ də itkin düşmüş vəziyyətdədir.

Misli görünməmiş sel, torpaq sürüşməsi, tufan və qasırğalar Malayziya, Şri-Lanka, Hindistan və Tailandda ciddi dağıntılara səbəb olub. Ən ağır vəziyyət İndoneziyada müşahidə edilir.

İndoneziya Milli Fövqəladə Hallar Agentliyi təkcə Sumatra adasında baş verən sel və torpaq sürüşmələri nəticəsində 916 nəfərin həyatını itirdiyini, 274 insanın itkin düşdüyünü, təxminən 4.200 ada sakininin yaralandığını bildirib. Axtarış-xilasetmə işləri isə hələ də davam etdirilir.

Fəlakət nəticəsində 3,2 milyondan çox insanın zərər çəkdiyi qeyd olunur. Xüsusilə Şimal Sumatra, Qərbi Sumatra və Açe əyalətlərində bir milyondan artıq insan təhlükəsiz bölgələrə köçürülüb.

İndoneziya prezidenti Prabovo Subianto açıqlayıb ki, ölkənin müdafiə və təbii fəlakətlərə hazırlıq imkanlarını gücləndirmək məqsədilə 2026-cı ilə qədər 200-ə yaxın helikopter alınması planlaşdırılır. Hökumət həmçinin fövqəladə hallara operativ reaksiya göstərmək üçün hərbi nəqliyyat təyyarələri də daxil olmaqla bütün mövcud resursların səfərbər olunacağını bir daha təsdiqləyib.

Şri-Lankada Fövqəladə Hallar Mərkəzinin verdiyi məlumata görə, noyabrın 17-də təsirini göstərən “Ditwah” qasırğası nəticəsində ölənlərin sayı 618 nəfərə çatıb, 209 insan isə itkin düşmüş sayılır.

Birləşmiş Millətlər Təşkilatı dekabrın 5-də bildirib ki, Tailandda təxminən 185 nəfər həyatını itirib, 367 insan isə itkin düşüb. Şiddətli hava şəraiti Hindistanda dörd, Malayziyada isə üç nəfərin ölümünə səbəb olub.