İstanbul Böyükşəhər Bələdiyyəsinin sədri Əkrəm İmamoğlu martın 18-də saxlanıldıqdan sonra bələdiyyə ilə bağlı aparılan korrupsiya istintaqı çərçivəsində həbs edilib.

  İstanbul Baş Prokurorluğu rəsmi açıqlamasında bu barədə bildirib: “Respublika Baş Prokurorluğu tərəfindən aparılan araşdırmalar nəticəsində Sülh Cəza hakimi şübhəli Əkrəm İmamoğlunun “cinayət təşkilatı yaratmaq və idarə etmək, rüşvət almaq kimi qanunsuz hərəkətlərinə görə həbs edilməsinə qərar verib.

  Lakin məhkəmə terror istintaqı çərçivəsində İmamoğlunun rəsmi həbsinə ehtiyac olmadığını bildirib.

  Qərarda "Əkrəm İmamoğluna silahlı terror təşkilatına yardım etməkdə güclü şübhə var, lakin onun maliyyə cinayətlərinə görə həbs olunacağına artıq qərar verildiyi üçün hazırkı mərhələdə buna ehtiyac yoxdur və tələb rədd edilir" ifadələrindən istifadə edilib.

  Xatırladaq ki, Ə.İmamoğlu və digər 99 şübhəli ilə əlaqədar İstanbul Respublika Prokurorluğu cinayət təşkilatı yaratmaq və idarə etmək, cinayət təşkilatına üzv olmaq, mənimsəmə, rüşvətxorluq, səriştəli dələduzluq, şəxsi məlumatların qanunsuz əldə edilməsi və dövlət tenderlərində qanunsuzluqlar törətmə maddələrilə istintaq başlayıb.

  Polis bölməsindəki prosedurlardan sonra şübhəlilər Çağlayandakı İstanbul Ədliyyəsinə sövq edilib və əməliyyatlar növbətçi Sülh Cəza Məhkəməsində icra olunub.

  PKK/KCK ilə əlaqəsi olduğu bildirilən Əkrəm İmamoğlu “terror təşkilatının şəhərlərdə təsirini artırmaq” kimi təşəbbüslərdə iştirakda ittiham edilirr.

  İstintaq çərçivəsində həbs olunanlar arasında İstanbul Böyükşəhər Bələdiyyəsi Mətbuat Xidmətinin katibi və İmamoğlunun müşaviri Murat Ongun və “İmamoğlu” inşaat şirkətinin baş direktoru Tuncay Yılmaz da var.

  Əkrəm İmamoğlu və digər şübhəlilər ittihamları rədd edirlər.