ABŞ Prezidenti Donald Tramp ilə Konqres üzvü İlhan Ömər arasında immiqrasiya siyasəti və sərhəd təhlükəsizliyi mövzusunda kəskin bir mübahisə baş verib. Fevralın 24-də Konqresin birgə iclasında çıxış edən Donald Tramp Demokrat qanunvericiləri sərhəd təhlükəsizliyini dəstəkləməməkdə və immiqrasiya məsələlərində administrasiyaya mane olmaqda günahlandırıb. Prezident bütün Konqres üzvlərini ayağa qalxaraq "Amerika hökumətinin ilk vəzifəsi qanunsuz immiqrantları deyil, öz vətəndaşlarını qorumaqdır" prinsipini dəstəkləməyə çağırıb.

Demokrat qanunvericilərin bu çağırışa reaksiya verməyərək yerlərində oturması Trampın sərt reaksiyasına və tərəflər arasında şifahi mübahisənin böyüməsinə səbəb olub. O, kürsüdən birbaşa etirazçılara müraciət edərək deyib: "Ayağa qalxmadığınız üçün özünüzdən utanmalısınız".

Prezident həmçinin "sığınacaq şəhəri" siyasətinə son qoyulmasını və ciddi ittihamlarla üzləşən sənədsiz immiqrantların deportasiyasına mane olan məmurların cəzalandırılmasını tələb edib.

Trampın çıxışı davam edərkən Minnesota ştatından olan Demokrat nümayəndə İlhan Ömər sərt ifadələrlə mübahisəyə qoşulub. Zalda onun Prezidentə tərəf dönərək yüksək səslə belə dediyi eşidilib: “Amerikalıları öldürürsünüz! Siz amerikalıları öldürdünüz! Utanmalısınız!”.