Yerli media orqanlarının yaydığı məlumata görə, İsrail işğal altındakı İordan çayının qərb sahilinin şimalındakı Cenin bölgəsində 126 yeni qeyri-qanuni mənzilin tikintisini təsdiqləyib. "Kanal 12" telekanalının xəbərində bildirilir ki, söhbət 20 il əvvəl boşaldılmış Sanur yaşayış məntəqəsindən gedir. Sözügedən ərazidə 126 mənzilin inşasına rəsmi razılıq verilib.

İordan çayının qərb sahilindəki yəhudi yaşayış məntəqələrini təmsil edən regional şuranın rəhbəri Yossi Daqan Sanurun yenidən qurulacağını bəyan edib. O bildirib ki, layihəyə 126 daimi evin inşası daxildir və gələcəkdə bu ərazinin İsrail şəhərinə çevrilməsi planlaşdırılır. Tikinti ilə bağlı təşkil olunan mərasimdə İsrail hökumətinin yüksək vəzifəli rəsmiləri, o cümlədən müdafiə naziri İsrail Katz və maliyyə naziri Bezalel Smotriç də iştirak edib.

Sanur yaşayış məntəqəsi 2005-ci ildə İsrailin Qəzza zolağından və İordan çayının qərb sahilindən geri çəkilməsi zamanı boşaldılan dörd yaşayış məskənindən biridir.

Fələstin rəsmiləri isə beynəlxalq ictimaiyyəti İsrailə təzyiq göstərməyə çağırıblar. Onlar qeyd ediblər ki, Birləşmiş Millətlər Təşkilatı beynəlxalq hüquqa görə bu cür yaşayış məntəqələrinin inşasını qanunsuz hesab edir. Fələstin tərəfinin məlumatına görə, 2023-cü il oktyabrın 7-də Qəzzada hərbi əməliyyatlar başladıqdan bəri İsrail İordan çayının qərb sahilini ilhaq etmək siyasətini daha da intensivləşdirib. Bu fəaliyyətlərə fələstinlilərə məxsus evlərin sökülməsi, əhalinin məcburi köçürülməsi və yəhudi yaşayış məntəqələrinin genişləndirilməsi daxildir.