Türkiyə Qəzzada çoxdan gözlənilən atəşkəsi alqışlayıb və beynəlxalq ictimaiyyəti müharibənin viran qoyduğu bölgədə kövrək atəşkəsi qorumağa və humanitar yardım və yenidənqurma səylərini dəstəkləməyə çağırıb.

Oktyabrın 23-də BMT Təhlükəsizlik Şurasının Fələstin üzrə iclasında çıxış edən Türkiyənin BMT-dəki daimi nümayəndəsinin müavini Aslı Güven deyib: "Türkiyə Qəzzada atəşkəsin əldə edilməsini alqışlayır və atəşkəs razılaşmasının tam və dərhal həyata keçirilməsini tələb edir".

Güven əlavə edib ki, beynəlxalq ictimaiyyət olaraq əsas prioritetimiz uzun müddətdir gözlənilən və çətinliklə qazanılan atəşkəsi hər nəyin bahasına olursa olsun qorumaq olmalıdır.

İşğal olunmuş İordan çayının qərb sahilində atəşkəs pozuntularının və İsrail zorakılığının qarşısının alınmasının zəruriliyindən danışan Güven xəbərdarlıq edib ki, İsrailin Livan, Suriya və daha geniş bölgəyə qarşı hücumları və sabitliyi pozan siyasəti dayandırılmalıdır.

Türk diplomat onu da deyib: "Yaxın Şərq daimi müharibə dövrünə dözə bilməz. Münaqişələr güc tətbiqi ilə deyil, diplomatik əlaqələr və danışıqlar yolu ilə həll edilməlidir. İkinci prioritet Qəzzaya humanitar yardımın maneəsiz çatdırılmasını təmin etmək və UNWRA da daxil olmaqla, BMT ilə əlaqəli təşkilatlarla sıx koordinasiyada yubanmadan yenidənqurma işlərinə başlamaqdır.