Fransa prezidenti Emmanuel Makron Benyamin Netanyahu administrasiyasını Qəzzada törətdiyi soyqırıma görə tənqid edərək bildirib ki, mülki əhalinin və girovların taleyini girovların azad edilməsinə üstünlük verməyənlərin ixtiyarına buraxmaq olmaz.
E.Makron qeyd edib ki, Netanyahunun əsas prioriteti girovların azad edilməsi deyil, əks halda o, Qəzzaya son hücumu həyata keçirməz və Qətərdə danışıqlar aparan heyəti hədəf almazdı.
“Müharibə mülki insanları öldürür, HƏMAS-ı məhv etmir,” – deyən Fransa prezidenti Qəzzada atəşkəsin təmin edilməsi ilə bağlı çağırışını təkrarlayıb və Fələstin dövlətinin tanınmasının sülh prosesini canlandırmaq məqsədi daşıdığını vurğulayıb.
Makron ABŞ-ı İsrailə mövqeyini dəyişməsi üçün təzyiq göstərməyə çağırıb. O, bildirib ki, Vaşinqton hərəkətə keçməsə, Avropa İttifaqı ölkələri sanksiyaları nəzərdən keçirməyə məcbur olacaq.
Fransa prezidenti İsrailin işğal altındakı İordan çayının qərb sahilini ilhaq etmək üçün hər hansı addımını “qırmızı xətt” hesab edir və Fransanın Qüdsdəki konsulluğunun bağlanmasının ciddi səhv olacağı barədə xəbərdarlıq edib.
