Yayımlanan birgə bəyanata əsasən, Ukrayna təxminən dörd ildir davam edən Rusiya–Ukrayna müharibəsinə son qoymaq məqsədilə Floridada ABŞ və avropalı tərəfdaşları ilə üç gün davam edən məhsuldar danışıqlar aparıb.
ABŞ Prezidentinin xüsusi nümayəndəsi Stiv Vitkoff rəsmi “X” səhifəsində etdiyi paylaşımda bu ifadələrə yer verib: “Ukrayna nümayəndə heyəti ABŞ və avropalı tərəfdaşları ilə bir sıra məhsuldar və konstruktiv danışıqlar aparıb”.
Bəyanatda qeyd olunub ki, danışıqlarda növbəti addımların vaxt qrafiki və ardıcıllığının müzakirəsinə xüsusi diqqət yetirilib. Eyni zamanda Ukraynanın ədalətli və davamlı sülhə nail olunmasına, hərbi əməliyyatların dayandırılmasına, təhlükəsizlik zəmanətlərinin təmin edilməsinə və rifah üçün sabit, uzunmüddətli şəraitin yaradılmasına üstünlük verməyə davam etdiyi vurğulanıb.
Birgə bəyanatda Ukraynanın ABŞ-ın liderliyini və dəstəyini yüksək qiymətləndirdiyi, eləcə də prosesin növbəti mərhələlərində tərəfdaşlarla sıx əməkdaşlığın davam etdirilməsinin vacibliyi xüsusi olaraq qeyd edilib.
Bildirilir ki, ABŞ Prezidenti Donald Trampın nümayəndələri ötən həftə sonu və bu həftənin əvvəlində Almaniyada Ukrayna və Avropa rəsmiləri ilə də danışıqlar aparıblar.
