Rusiya iyunun 28-dә gecə saatlarında Ukraynaya qarşı müharibənin başlanğıcından bəri ən genişmiqyaslı hava hücumunu həyata keçirib. Ukrayna rəsmilərinin verdiyi məlumata görə, hücum zamanı 477 pilotsuz uçuş aparatı və 60 raket istifadə olunub.
Ukrayna Hərbi Hava Qüvvələrinin məlumatında bildirilir ki, bu hücum son üç ildən artıqdır davam edən müharibənin sona çatacağına dair ümidləri daha da zəiflədib.
Qurumun yaydığı bəyanatda qeyd olunur ki, 249 pilotsuz uçuş aparatı Ukrayna qüvvələri tərəfindən məhv edilib, 228-nin isə böyük ehtimalla elektron maneə səbəbilə hədəfə çatmadan sıradan çıxdığı ehtimal olunur.
Ukrayna Hərbi Hava Qüvvələrinin Kommunikasiya rəisi Yuriy İqnat "Associated Press" agentliyinə açıqlamasında bildirib ki, həm müxtəlif tipli raketlər, həm də pilotsuz uçuş aparatlarının həcmi baxımından bu hücum Ukraynaya qarşı indiyədək baş vermiş ən genişmiqyaslı hava hücumudur.
Hücum zamanı Ukraynanın cəbhə xəttindən uzaqda yerləşən qərb bölgələri də daxil olmaqla bir çox ərazi hədəf alınıb.
Polşa Hərbi Hava Qüvvələri isə bəyan edib ki, ölkə hava məkanının təhlükəsizliyini təmin etmək məqsədilə Polşa və müttəfiq ölkələrin hərbi təyyarələri havaya qalxıb.
Xerson vilayətinin hərbi administrasiyasının rəhbəri Aleksandr Prokudin bölgəyə edilən pilotsuz hava hücumu nəticəsində bir mülki şəxsin həlak olduğunu bildirib.
Çerkassı vilayətinin qubernatoru İqor Taburets isə hücum nəticəsində biri uşaq olmaqla altı nəfərin yaralandığını açıqlayıb.
